भांगरभूंय | प्रतिनिधी
फोंडें, प्रतिनिधी: दुर्गीणी – धारबांदोड्यां सोमारा सांजेवेळार वोल्वो बस गटारांत वचून अपघात घडलो. ह्या अपघातांत सुमार २६ प्रवाशी जखमी जाले. तांतल्या १० जाणांच्या हाता- पायांक गंभीर जखमो जाल्यो. फुडाराक हे सुवातेर अपघात जावचे न्हय देखून बांदकाम खात्यान हांगचो एकोडो मार्ग कायमचो बंद करपाची मागणी वाहन चालक करतात.
३५ प्रवाशी घेवन वचपी वोल्वो बस सोमारा सांजेवेळार दुर्गीणी – धारबांदोडेंच्या एकोड्या मार्गार आशिल्ल्या वोल्तार चालकाचें नियंत्रण गेल्ल्यान गटारांत वचून कोसळ्ळी. हातूंत बस चालकाक बसी पोंदा पडून मरण आयलें. हांगचो एकोडो रस्तो लोकां खातीर धोक्याचो जाला. गोंयच्यान कर्नाटका वचप्यांक ह्या रस्त्यार आशिल्ल्या वोल्ताचो अंदाज वाहन चालकांक येना आनी अपघात घडटात. फाटल्या वर्सा हेच सुवातेर एके गाडयेन झाडाक धपको दिवन गाडी पुरायेन जळिल्ली. ताका लागून ह्या वाठारांत आशिल्लो एकोडो रस्तो येरादारी खातीर बंद केल्यार निश्चीतूच अपघात जावप उणे जावपाची शक्यताय हांगचे नागरीक उक्तायतात.
सोमारा अपघात जाल्या उपरांत धारबांदोडा पंचायत वाठारांतल्या लोकांनी घडणुके सुवातेर पावून लोकांक बसींतल्यान भायर काडले. तेन्ना खुबश्या लोकांनी हांगा आशिल्लो एकोडो रस्तो बंद करपाची मागणी केली. अपघाता उपरांत फोंडें येरादारी पुलीस निरीक्षक कृष्णा सिनारी हांणी अपघाता सुवातेर वचून मंगळारा तपासणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
