भांगरभूंय | प्रतिनिधी
पणजी, प्रतिनिधी ः डिजीटल तंत्रज्ञानाक लागून सायबर गुन्यांव, फटींचे फोन येवप, बँक खाते तशें ऑट्सअॅप, फेसबुक खाते हॅक जावप अश्यो घडणुकी घडतात. देखून अशा वायट प्रवृत्तीं पासून सगळ्यांनी सावधान रावप गरजेचें. ह्याच विशयाचेर जागृताय निर्माण करपा खातीर गोंय पुलिसांच्या सायबर सेलान ‘सायबर सुरक्षा के लिए सायबर शिक्षा’ उपक्रम सुरू केला. सायबर सुरक्षा ही प्रणाली, नेटवर्क आनी कार्यावळी डिजिटल हल्ल्या पसून राखण दिवपाची पद्दत.
पुण्यांतल्या क्विक हील फावंडेशनाच्या आदारान गोंयांत हो उपक्रम सुरू केला अशी म्हायती गोंय सायबर सेलान दिली. काल पर्वरींतल्या विद्याप्रबोधिनी उच्च माध्यमीक शाळेंतल्यान ताची सुरवात जाली. आतां राज्यांतल्या वेगवेगळ्या शिक्षणीक संस्थांनी विद्यार्थ्यांक हे विशीं म्हायती दितले. हाचे वांगडाच 40 भौशीक सुवातेर रस्त्यार पथनाट्य सादर करुन लोकांक सादूर रावपाची खबर दितले. हांतूत सायबर चोर कशे फटयतात? सायबर कट कशे तयार करतात? सायबर सुरक्षा म्हणल्यार नेमके कितें? ताच्या पसून कशी जतनाय घेवची ह्या विशीं म्हयती दितले.
सायबर सेलाचे पुलीस अधीक्षक अक्षत कौशल (आयपीएस) हांणी पर्वरे कार्यावळीचें उक्तावण केलें. ह्या वेळार मुख्याध्यापिका रेषा पेडणेकार, पुलीस निरिक्षक विद्यानंद पवार, सुनील नलावडे आनी हेर मानेस्त हाजीर आशिल्ले.
सायबर सेल पुलीस निरिक्षक विद्यानंद पवार हांच्या मार्गदर्शना खाला सगळ्यो रस्त्या वयल्यो नाटकां घडोवन हाडटले. सायबर गुन्यांवाच्या म्हत्वाच्या प्रस्नांचेर भर दिवपी हें रस्त्या वयलें नाटक मराठींत आसा. हाचे आदीं गुजरात, हरियाणा, तेलंगणा आनी भारतांतल्या हेर वेगवेगळ्या राज्यांनी अशेच तरेचे पथनाट्यांचें आयोजन जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
