भांगरभूंय | प्रतिनिधी
काळी ब्रिगेडीचें मुख्यमंत्री सिद्धरामय्यांक निवेदन
जोयडा: काळी वाग प्रदेशांतल्यान वचपी पणजी-बेळगांव राष्ट्रीय म्हामार्गा वयल्या अनमोड रस्त्या वयल्यान वचपी वाहनां कडल्यान रान विभाग अनधिकृतपणान प्रवेश शुल्क घेता. हें शुल्क घेवप तत्काळ थांबोवचें अशी मागणी काळी ब्रिगेडीन मुख्यमंत्री सिद्धरामय्या हांचे कडेन केल्या. नाजाल्यार आंदोलन करपाची शिटकावणी दिल्या.
दांडेली रान संरक्षण तशेंच काळी वाग प्रकल्पाचे निर्देशक हांचे वतीन हे विशीं मंगळारा मुख्यमंत्र्याक निवेदन भेटयलें. ह्या वेळार काळी ब्रिगेडीचे मुखेल संघटक अॅड. सुनील देसाय हांणी म्हणलें, रानजीव संरक्षण कायदो 1972 च्या कलम 27 (1)(डी) प्रमाण अभयारण्याच्या म्हामार्गा वयल्यान प्रवास करपी मनशाक कसलोच परवानो वा शुल्क भरपाची गरज ना. तेच प्रमाण कलम (क) प्रमाण अभयारण्या भितर रावपी मूळ रहिवाशां खातीर अशें कसलेंच बंधन ना. पूण, प्रधान मुख्य रानसंरक्षक (रानजीव) राजीव रंजन हांणी ह्याच कायद्याच्या कलम 28(2) प्रमाण म्हामार्गा वयल्यान वचपी वाहनां कडल्यान प्रवेश शुल्क घेवपाचो आदेश चुकीचे पद्दतीन जारी केला.
कलम 28(2) आनी कलम 28(1) त नमूद केल्ल्या उद्देशां खातीर अर्ज करप्यांक शुल्क आनी अटींचे अधीन रावन परवानगी दिवपाची तरतूद आसा. पूण, राजीव रंजन हांणी ते सगल्यांचेर लागू करून आमचेर अन्याय केल्ल्याचें देसाय हांणी सांगलें.
ताका लागून ह्या वाठारांतल्या लोकांक खूबशा नव्या समस्यांक सामकार वचचें पडटा. अनमोडा येरादारीची कोंयडी, वाहनांच्या धुंवराक लागून जावपी पर्यावरण प्रदुशण, सेगीत रस्तो अपघात, आपत्कालीन सेवांचेर परिणाम, वाहनांच्या बी त्रासांक लागून थळाव्यांचेर व्हड अर्थीक ताण पडला. हे रोखडेंच आडायलें ना जाल्यार फुडारांत खर आंदोलन करतले अशी शिटकावणी देसाय हांणी दिली.
ह्या वेळार काळी ब्रिगेडचे मुखेल समितीचे अध्यक्ष उमेश वेळीप, आदले अध्यक्ष सतीश नायक, किरण नायक, नारायण हेब्बार, प्रभाकर नायक, सचीव समीर मुजावरा, दिनेश देसाय, बसवन्नय्या हिरेमठ, दिलीप गांवकार, जयराम देसाय, ईश्वरी देसाय, सोमेश्वर नायक बी मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
