भांगरभूंय | प्रतिनिधी
-2 उद्देग बंद करपाचे निर्देश, 12 उद्देगांक ‘कारणां दाखयात’ नोटीस
पणजी : राज्य प्रदुशण नियंत्रण मंडळान फाटल्या कांय दिसांत राज्यांतल्या रेड श्रेणींतल्या 35 उद्देगांचें पर्यावरणीय ऑडीट केलां. तातूंतले दोन उद्देग बंद करपाचे निर्देश दिल्यात. सुमार 12 उद्देगांक ‘कारणां दाखयात’ नोटिसो जारी केल्यात, अशी म्हायती मंडळाचे अध्यक्ष महेश पाटील हांणी मंगळारा आमच्या प्रतिनिधी कडेन उलयतना दिली.
आतां मेरेन ज्यो कंपनी, कारखाने, उद्देगा विशीं कागाळी येताल्यो, तांचेच पर्यावरणीय ऑडीट करताले. पूण अंदूं सगल्याच उद्देगांचे ऑडीट करपाचे थारावन मंडळान ते विशींची प्रक्रिया मे म्हयन्या पसून सुरू केल्ली. फाटल्या वर्सभरांत सुमार 30 कंपनी, उद्देगां कडल्यान प्रदुशण जायत आशिल्ल्याच्यो कागाळी प्रदुशण नियंत्रण मंडळा कडेन आयिल्ल्यो. ताका लागून पयल्या टप्प्यांत मंडळान रेड श्रेणींत आशिल्ल्या कारखान्यांचे ऑडीट करपाचे निश्चीत करून पयल्या दोन म्हयन्यांत मुरगांव पोर्ट ट्रस्ट (एमपीटी), वेदांता, गोवा शिपयार्ड, सिप्ला हे सयत 16 उद्देगांचे ऑडीट केल्ले.
ते उपरांत मोट्या प्रमाणांत प्रदुशण जावपी उद्देगांचे पयल्या टप्प्यांत, कागाळी आयिल्ल्या उद्देगांचे दुसऱ्या टप्प्यांत आनी ते उपरांत सगल्याच उद्देगांचें पर्यावणीय ऑडीट करपाची प्रक्रिया सुरू केल्या. पयल्या टप्प्यांत मंडळान ‘रेड श्रेणी’तल्या सुमार 35 कंपनींचे ऑडीट केले. तातूंतल्या सुमार 14 कंपनी कडल्यान मंडळाच्या कायद्याक पाळो दिनात, अशें उक्तें जाले उपरांत मंडळान नावेलीची मोहीत इस्पात आनी सां जुझे दी आरियलांतली नुस्तें वेवसाया कडेन संबंदींत एक अशो दोन कंपनी बंद करपाचे निर्देश जारी केले.
ते उपरांत मोहीत इस्पात कंपनीन मंडळा कडल्यान आयिल्ल्या आदेशांक खरपणान पाळो दिवपाक सुरवात केले उपरांत ही कंपनी परतून सुरू करपाक मंडळान परवानगी दिल्या, अशें पाटील हांणी सांगलें. विवीध वाठारांतल्यो सुमार 12 कंपनी कडल्यान सातत्यान प्रदुशण नियंत्रण मंडळाच्या विवीध कायद्यांक पाळो दिनात, अशें दिसून आयलां. तांचे कडल्यान जाप आयले उपरांत फुडलो निर्णय घेतले, अशें तांणी म्हणलें.
मजगतीं, राज्यांत विवीध प्रकाराचे सुमार तीन हजार उद्देग आसात. ह्या सगल्यांचे पर्यावरणीय ऑडीट करतले, अशेंय पाटील हांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
