भांगरभूंय | प्रतिनिधी
गोंयचे भाग्यविधाते पयले मुख्यमंत्री भाऊसाहेब बांदोडकार हांची याद राज्यांतल्या कोनशा कोनशांनी काडली. प्राथमीक शिक्षणाचो गांवांगांवांनी तांणी घाल्ले बुन्यादीचो विस्तार उपरांत आदले मुख्यमंत्री प्रतापसिंह राणे, मनोहर पर्रीकार हांणी केलो. गावडा, कुणबी, वेळीप, धनगरच न्हय जाल्यार हेर मागास वर्गांतले आयज शिक्षणांतल्यान उंचेले सुवातेर पावल्यात.
उंचेल्या वर्गा वांगडा तांचेय जिणेशैलींत बदल जाल्यात, चार- चार गाडयो गांवां- शारांतल्या तांच्याय घराघरांनी पावल्यात. जिणेशैलींतल्यान भलायकी इबाडटा, जिवूय वगडावचो पडटा. पांच पावलां चलचीं, चार पावलां फाटींय घेवचीं पडटात. गाडयांचीं गणितां पर्रीकार हांणी विधानसभेंत धा वर्सां आदीं मांडिल्लीं, जिणेशैलींतल्यान येवपी दुयेंसां पासत येवजण्यो केल्ल्यो. तांचीं सपनां चार, केंद्र सरकाराच्या पालवान तीं आयज आठ जावंक शकतात. राजकी इत्साशक्त आसल्यार गोंय वैजकी म्हाविद्यालयांत 300 विद्यार्थ्यांक फुडल्या वर्सा सावन प्रवेश मेळपा खातीर नेटान वावराक लागचें.
गाडयो, स्कुटरी, टीव्ही, रॅफ्रिजिरेटर, ओव्हन भारत स्वातंत्र्य दिसा निमतान घरांनी समेस्तां वांगडा पत्रकारय हाडटले. पयल्या दिसा जायराती चड आशिल्ल्यान खबरांक सुवात उणी, स्वातंत्र्य दिसाची सुटी, उपरांत चार दीस स्वातंत्र्य दिसाच्यो खबरोच खबरो. नागपंचम, सुतापुनव लागीं पावतना सुपरमॅन जायात, सादूर रावात.
चोवीस तास ब्रेकिंग न्यूज येतना, देशी विदेशी जातना पत्रकारांच्यो सुटयो उण्यो जायत गेल्यात. ते खातीर, जिणेशैलींतल्या बदलांतल्यान समेस्तां वांगडा पत्रकारांची भलायकीय आतर्या पयऱ्यान इबाडटा, तांकांय अपघात जातात. उत्तर- दक्षिणेंतले खबरांकार तेन्ना मजत करतात, तांकांय कल्याण निधी, आरोग्य विमो मेळपाक जाय. आशिल्ल्या सरकारी येवजण्यांची फास्की मोडचे परस ल्हान बदलांतल्यान तो लाव सगल्यांक मेळपाक हरकत ना. अर्थसंकल्पांत जाय तितली तजवीज जावची, येवजणेचीं गणितां इबाडचीं न्हय.
गोंयच्या दिसाळ्यांनी खबरो दिवपी गांवगिऱ्या वाठारांतले पत्रकार भोव- माध्यमी जातात तेन्ना तांकां प्रशिक्षण दिवपाक प्रुडंट जायात, तिकाय आसपावन घेयात. गोंयचे खंयचे वाठार आयज गांवगिरे उरल्यात ताची माहिती गांवांतले खबरांकारच बरे दिवपी. खबरो दिवपाचो वावर शिक्षणा वांगडा साहित्यांत चड घुस्पल्ले पत्रकार रमेश वंसकार समाजीक वावरांतय आसात. शिक्षक सुभाष महाले, पद्माकर केळकार, भारत बेतकेकार, दयानंद राणे अजून खबरो दिवपांत क्रियाशील आसात. तुषार टोपले, प्रकाश तळवणेकार उत्तर गोंयच्यान दक्षिणे मेरेन वचून सगल्यांक एकठांय हाडत जाल्यार खबरांकारांचे नवे पिळगेची बांदावळ जातली. जिणेशैलींतल्या बदलांतल्यान, अपघातांतल्यान नवी पिळगी शाणी जातली अशें न्हय पूण शाबासकी मेळ्ळ्यार तिकाय बळगें मेळटा.
एकामेकांक सांबाळळ्यार सुटयेचीं गणितांय जाग्यार घालपाक येतात. गोंयच्या लोकप्रतिनिधींची इत्सा आसल्यार अपघातांचो आंकडो (मटक्याचो न्हय) उणो करपाक, जिणेशैलींतल्यान येवपी दुयेंसांचेर वाट दिसतली. बाणस्तारी अपघात गाजलो, अपघातांत मरण आयिल्ल्यांची, दुखापत जाल्ल्यांची जापसालकी सरकार कित्याक घेता? रस्तो सारको नाशिल्लो? रस्त्याक फोंडकुलां पडिल्लीं? लायटीचे खांबे, लायटी आसात? सोद पत्रकारितेंतल्यान तो विशय मांडपाक जाय. कितेंय जाल्यार तिका रोखडोच दोश दिवप समा जायत? विचार करात. गाडयो घेतना, परवाने दितना ड्रायव्हर प्रशिक्षणार्थी (एल) आसचे नात हाची जतनाय सरकार घेता? ब्रिटीशांच्या तेंपा वयल्या कायद्यांत रातयां बदल जाल्यात जाल्यार पुस्तकांतल्यान ते आदवोगादां मेरेन केन्ना पावतले? येरादारी कायद्यांत येरादारीची नेमावळ मोडटल्यांक ख्यास्त कायदो करतलो. पत्रकारांनी, खबरांकारांनी, नागरिकांनी न्यायाधीश जावचे परस तटस्थ रावन बाणस्तारी अपघातांतलें सत सोदचें, मांडचें. अपघाताचे सुवातेर शारांतले कितले पत्रकार, केन्ना पावले?
जार्दिन्यां, स्पायस प्लान्टेशनस, फार्म हावसांनी सोऱ्याच्यो पार्ट्यो जावच्यो ना म्हणून आदेश काडचो म्हणून गोंयकारांनी सरकाराच्या फाटल्यान लागचें. परशुराम पुतळो, योगासनांची माहिती दिवपी नवे सुवातेर, कांपाल वॉक वे, हेर भौशीक सुवातींनी, दर्यादेगेर जेवण करचें न्हय, सोरो पियेवचो न्हय अशे तकटे आसल्यार, राखणे ना, धरपी पुलिसूय ना. पर्रीकार हांणी कायदे केल्ले आसात, तांचोच वापर करून पर्यटन खात्यान, पंचायत, नगरपालिकांनी पुलिसांक नवी दिका दाखोवची.
येरादारी परस पंचायतींचे येणावळींत मंत्र्यांक आस्था आसा. येरादारींत शिस्त हाडपाक सी.सी.टी.व्ही. वा ए.आय. न तांक वाडोवपी कॅमेरा बरे पूण कॅमेरा मुखार आसात ह्या तकट्यांचे कुवाडें कशें सोडोवप? तकटे आमकां दिसतात तुमकां दिसले? भाऊंच्यो यादी विज्ञानीक डॉ. रघुनाथ माशेलकार हांणी सांगल्यो. भारत महासत्ता 2020 मेरेन जातलो हें सांगपी डॉ. माशेलकार जिणेच्या एका वेगळ्याच पांवड्यार गोंयांत आयिल्ले तेन्ना तांकां मेळपाक (सॉरी, पळोवपाक) मूठभर विद्यार्थीय आशिल्ले. कितें अणभव आसा तांचो? तेच ल्हान, व्हड गोंयकारांची आयजय स्फूर्त? त्रास काडून शिक्षण घेवप, भाऊंची पुण्याय म्हणल्यार कितें तें तांचे कडल्यान आयकूंक मेळप हेंच भाऊंचे पुण्यतिथीचें फळ. भारतांतलो उच्च शिक्षणाचो पांवडो अजून सुदारपाक जाय अशें मेकळेपणान तांणी सांगलें. शिक्षण होच सत्तेचो मध्यबिंदू आसचो, उच्च शिक्षण म्हणल्यारच उदरगत हीं तांचीं उतरां मुख्यमंत्री डॉ. प्रमोद सावंत, शिक्षण सचीव आय.ए.एस. प्रसाद लोलयेंकार हांकां जागोवपी. पत्रकारय जागे जायत? जागयत? सुदारत?
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
