भांगरभूंय | प्रतिनिधी
झंडा ऊँचा रहे हमारा, विजयी विश्व तिरंगा प्यारा, भारत आमचो म्हान देश हीं अज्रंवर देशभक्ती गितां. भारत स्वातंत्र्याचें अमृत महोत्सवी वर्स सोंपतनाय अंदूं 15 ऑगस्टाक तीं आयकुपाक मेळटलींच. गोंयाक नवे दिकेन व्हरपी मनोहर आंतरराष्ट्रीय विमानतळ, मोपा – पेडण्यां स्वातंत्र्याच्या अमृत महोत्सवांत सुरू जाला हाचो अभिमान दर एका गोंयकाराक दिसपाक फावो. मोपा विमानतळ जाल्ल्यान दाबोळी बंद जातलो ही भिरांत दक्षीण गोंयच्या साश्टी, मुरगांव तालुक्यांतल्या लोकप्रतिनिधींच्या मनांत आसा. समेस्तांचें कितें? खरेपणीं दक्षिणेंतले समेस्त भियेल्यात? तांच्या वेवसाय, उद्येगाक बादा आयल्या? नव्या विमानतळा वयल्यान येरादारी सुरू जावन स म्हयन्यांनी गोंयांत कितें बदल जाल्यात? पेडणें तालुक्याक लुकसाण जालां? पश्चीम घांटांतल्या सैमाच्या वातावरणांत गोंय मुक्ती उपरांतचो पयलो स्वतंत्र विमानतळ आसा. सैम सांगातांतल्या मनोहर विमानतळा खातीर लोकजिणेंत जाल्ल्या बदलांची, सैमाच्या विध्वंसाची काणी थळाव्या पत्रकारांनीच सांगपाची. काणयो सत आसच्यो, खरसाण आसतलीच पूण तीय खरेपणाच्या लागसार वचपी आसची. पत्रकारांनी अचूक माहिती दिल्यार वीज, उदक, रस्ते, रोजगाराचीं आडमेळीं पयसावपाक कळाव लागतलो? पेडणेंचे आमदार प्रविण आर्लेकार विधानसभेंत आपल्या मतदारसंघांतले उदरगतीचे प्रस्न विचारून म्हत्वाची माहिती मेळोवपाक जैतीवंत जाल्यात. माहितीचो बरो उपेग केल्यार तांच्या मतदारसंघांतल्यान गोंयच न्हय, देश विदेशाक लाव जातलो हाची तांकां जाणविकाय जातली.
गोंयचे उत्तरेक आशिल्लो पेडणें तालुको म्हणल्यार सैमाचीच न्हय भांगर आनी वज्रांचीय खण. भांगरा, वज्राच्या, वखतां खणींचो सांबाळ सैमा वांगडा जावचो हाची जतनाय घेवपा खातीर पेडणेंच्या आमदारांनीच न्हय उत्तर गोंयच्या सगल्या मंत्री, आमदारांनी क्रियाशील रावचें पडटलें. मनोहर मोपा विमानतळाक देश, विदेशांतलो म्हान विमानतळ म्हणून नामना मेळची हे पासत विमानतळ वाठारांतलेच न्हय उत्तर गोंयचें कोयर, उदका वेवस्थापन शिस्तीन जावचें म्हणून उत्तरेंतल्या पत्रकारूय वांटेकार जातात? कोयर वेवस्थापना पासत ते खातीर आमी पणजेंतल्यान वावर केल्लो तुमीय करचो. सत्तरींतल्यान पणजे येवन ल्हानांतल्यान व्हडा पदांचेर पावपी पत्रकारांक तांच्या गांवाचो, वाठाराचो हुसको आसतलो. गांवांत कार्यकर्ते जावपी पत्रकारांची जापसालदारकी राजधानींत येतकीच वाडटा, तांकां राज्याचेंय पळोवचें पडटा. अणभवांतल्यान गांवांतल्या हेरांकय आपल्या वांगडा फुडें व्हरतना संपादपी सदगुरु पाटील, पांडुरंग गांवकार, खबराकारांक उदरगत म्हणल्यार कितें तें खबर आसा. गरज आसा ती नवे कायदे समजून घेवपाची. भौमाध्यमी जातना पत्रकारितेंतलो विश्वास गांवांतल्यान राजधानी मेरेन उरपा पासत तेंच तांकीचें लिखाण संपादप्यां कडल्यान अपेक्षीत आसा.
लोकसभा वेंचणूक लागीं येता तशें देशांत लटाफटीचें वातावरणय तयार जाल्यार गोंयांत तशें जावचें न्हय हे खातीर लिखाणांतल्या उतरांनी संवेदनशीलताय जाय. गोंयांतल्यान गिन्यानी, उच्च शिक्षण घेवपी लोकप्रतिनिधी लोकसभेर पावचे हे खातीर लोकमत तयार करपाक पत्रकारांचो वांटो आसा.
आमचे हे गोंयचे भांगरभुंयेंत लोकभाशेक मोल व्हड, आदले प्रधानमंत्री पंडीत जवाहरलाल नेहरूंनी वोगीच “अजीब है ए गोवा के लोग” म्हणलां हाची याद दवरात.
साडेतीन दसकांतले पत्रकारितेंत गोंयचें राजभवन ते नौदळाच्या, देशांच्या हेर राज्यांतले विमानतळ आमी पळयले,
आतांची पत्रकार पिळगी विदेशांतय पावता आसतली.
देश विदेशाच्यो भोंवड्यो करतना ‘झंडा ऊँचा रहे’ म्हणपाक विसरूं नाकात, दुसऱ्यांचेर पातयेवन रावल्यार खबरोय शेणटात. खबरो एक सारक्यो आसल्यार वाचपी शेणटले, ते खातीर वेगळेपण दाखोवन दिवचें पडटा. व्हिज्युवल मिडियाची शक्ती वाडटा तेन्ना दिसाळ्यांनी पयल्या दिसाची खबर दुसर्या दिसा दिवचे परस न दिल्ली बरी. खबरेचें विश्लेशण करप, खबरांचे माथाळे दिवप हेंय आव्हान. खबरे परस माथाळ्यांक (हेडिंग) म्हत्व येवपाक लागलां, माथाळ्यांतल्यान खबरेंत कितें लिपिल्लें आसा तें कळपाचें तंत्र शिकप आदीं जालें, आतां घुस्पागोंदळच चड. खबरो पानार ओडून त्यो पानाचे डमी प्रमाण लायतना उतरां कापप, गिळप, मुद्दम पेटोवन घालप, काल जालें तें माफीचेर पचुनूय गेलें. आयज भौमाध्यमांतल्यान खबरो पेटयतना, कापतना, फोटो घालतना, फोटो खाला कॅप्शन दितना सांबाळात म्हणून याद करून दिवची पडटा. समेस्तां पासत आशिल्ल्या कायद्या खाला पत्रकारांकय ख्यास्त जावंक शकता हें मतींत दवरून.
स्वातंत्र्याचें अमृत महोत्सवी वर्स सोंपतनाय अमृतकणांचो शिंवर उतरांनी करचो. तिरंगो गाडयो, घरांचेर लायतना ताचें म्हत्व, घेवपाचे जतनाये विशीं, समेस्तांक सांगप तुमची आमची लागणूक. घरांतल्यान माहिती दिवपाक आरंभ केल्यार? नाच गायनाचे कार्यावळींतले तिरंगे हे वटेन ते वटेन, कोयरांत पडचे न्ही अश्यो सुचोवण्यो करच्यो. अमासेच्या पर्वांतल्या अंदूंच्या स्वातंत्र्य दिसा सत्री जाय, पावस आसा, श्रावण येता.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
