सलाम गोंयच्या श्रमीक पत्रकारांक

भांगरभूंय | प्रतिनिधी

माफ करात. ‘सरकारचे डोके ठिकाणावर आहे का?’ हो माथाळो लोकमान्यतायेंतल्यान लोकमान्य ही पदवी मेळोवपी, देशाचे सुटके झुजा खातीर दिसाळीं काडपी पत्रकार बाळ गंगाधर टिळक हांच्या अग्रलेखाचो. लोकमान्यांच्या अग्रलेखाचे यादी पासत ती बरयली. ते ओळी परस “स्वराज्य हा माझा जन्मसिद्ध आहे आणि तो मिळवणारच” हे ओळीचें म्हत्व सदां उरतलें, उरपाक जाय. टिळकांचे जयंती, पुण्यतिथीक तांकां आर्गां ओंपप सरकार, पत्रकारांची लागणूक. सरकाराक आपल्या हक्कांची जाणविकाय आसा पूण पत्रकारांक आपले हक्क खबर आसात? गोवा श्रमीक पत्रकार संघटणेचें (गुज) मुळावण घालपी वांगड्यांनी आमकां तुमकां हक्कांची, लागणुकेची माहिती दिवपी कार्यावळी केल्यो. मुळावणा मागीर कांय तेंप गुजाचो वावर बंद पडिल्लो. वरिश्ठ, ज्येश्ठ पत्रकार गुरुदास सावळ हांचे यादी प्रमाण 1975 वर्सा संघटणेक परतून संजीवनी मेळ्ळी. श्रमीक पत्रकारांक घडोवपाक पत्रकार फ्लावियान डायस, बालाजी गावणेकार हांचो व्हड वांटो आशिल्लो. जगदिश वाघ, गुरुदास सिंगबाळ, प्रमोद खांडेपारकार, आर व्ही प्रभुगांवकार (रघुनाथ विष्णु प्रभुगांवकार), गुरुदास सावळ हे गोंयचे श्रमीक पत्रकारितेचे खांबे. हें विखुरिल्लें पान श्रमीक पत्रकारितेंतल्या लाल सलामाक. आपली लेखणी सकारात्मक रितीन वापरून, सत सांगत गरज तेन्ना सरकाराचेर बडी कशी मारप तांचे कडल्यान शिकचें. राज्याचे उदरगती वांगडा दिसाळीं तिगचीं, पत्रकारांचे तंटे, वेतन मंडळांची स्थापना जावपाक झगडपाचे, रस्त्यार येवन तीं चालीक लावपाचे प्रस्न सुटावे जावचे पत्रकारांक बऱ्यो सुविधा मेळच्यो हे खातीर ते वावुरले. सिरील डिकुन्हा, सिंगबाळ हांचे वरी बालाबाब गावणेकार हांचो गोंयच्या सुटके झुजाच्या निमण्या पर्वा कडेन संबंद आयिल्लो. बालाबाब, सावळबाब, खांडेपारकार हेच न्हय जाल्यार ज्येश्ठ पत्रकार चंद्रकांत केणी, उदय भेंब्रे, आर व्ही प्रभुगांवकार, प्रमोद खांडेपारकार, वामन प्रभु राजभास चळवळी वेळारय क्रियाशील आशिल्ले. गुजाचो स्थापना दीस मनयतना डायसबाब, बालाबाब हांची याद कोणाक जातली?
संपादपी आनी पुराय वेळ दिसाळ्याच्या वावरांत आशिल्ले पत्रकारितेचो धर्म पाळपी पत्रकार निमणे वरिश्ठ, ज्येश्ठ ह्या बिरुदां परस तांचे पत्रकारितेंतल्या वावरा खातीर यादींत उरतले. पत्रकार हो सदांच पत्रकार (अ जर्नालिस्ट इज अ जर्नालिस्ट फॉरेव्हर) अशें सांगपी पत्रकार राष्ट्रमतकार चंद्रकांतबाब केणी हांचो पत्रकारितेंतल्या वावरा पासत जिणे गौरव जावपाक जाय.
गुज तांच्या नांवाची सुचोवणी सरकाराक करिना जाल्यार दक्षीण गोंय पत्रकार संघटनेन, संपादक गिल्डान तें काम करचें. चंद्रकांतबाब फकत एक पत्रकारच न्हय जाल्यार म्हान लेखकय आशिल्ले. तांणी तशेंच उदयबाब हांणी पत्रकारितेंतल्यान राजभास चळवळी खातीर दिल्लें योगदान गोंयांक राज्य पांवडो मेळोवपा पासत म्हत्वाचें पावल थरलें. चंद्रकांत, उदयबाब हांचे पत्रकारितेंतल्या वावराची सरकारान दखल घेवपाकच जाय. चंद्रकांतबाब, बालाबाब, वाघ फ्लावियानबाब हांचो मरणोत्तर जिणे गौरव जावचो. उदयबाब, खांडेपारकार, वाळवे, आर व्ही प्रभुगांवकार, सावळ, जयंत संभाजी, प्रभु हे जिणे गौरवाक पात्र आशिल्ले वरिश्ठ पत्रकार.
सरकारान पत्रकार कक्ष पणजेंत दिवपाची घोशणा केली. एका तेंपार पत्रकारांक पत्रकार कक्षाची गरज आशिल्ली. आदलो पत्रकार कक्ष आजय आदिलशहाच्या राजवाड्यांतल्या पोरण्या सचिवालयांतले कोनशा वयले कुडींत नांवान आसा. इफ्फींत वांटेकार जावपी पत्रकारां खातीर बांदिल्लीं मिडिया सेंटरां वर्सभर वापरूंक येतात. त्या सेंटरांनी आधुनीक साधनसुविधा आसात. चलच्या, भोंवच्या परस आज वर्क फ्रॉम होम, ऑफीस करपी पत्रकार चड. पर्वरी विधानसभा संकुलांतलो पत्रकार कक्ष विधानसभे वेळार चडांत चड वापरपाक मेळटा. पणजेंतल्या पत्रकार कक्षांतल्यान आदले मुख्यमंत्री मनोहर पर्रीकार विरोधी मुखेली ते संरक्षणमंत्री पदा मेरेन पावले. तांचोय गुजाच्या 46 वर्साच्या पयल्या सुवाळ्यांत जिणे गौरव जावपाक हरकत नासली. श्रमशक्ती बिल्डिंगेंतलें गुजाचें कार्यालय, पत्रकार कल्याण निधी, कम्प्युटर, कॅमेरा येवजणी चालीक लावपाचें काम तांच्याच तेंपा वयलें. तांच्या पालवान ‘गोवा दूत’ दिसाळें सुरू जाल्लें. श्रमशक्तींतल्या गुजाच्या कार्यालयाच्या उक्तावणांत पयलींचे गुज अध्यक्ष, सरचिटणीसांचो भोवमान जाल्लो. अंदूं स्थापना दिसाच्या निमतान गौरवा परस गुजाच्या फुडाराची दिका कशी आसची हे खातीर भासाभास जावप म्हत्वाचें. वेंचणूकच न्हय जाल्यार देश पांवड्या वयले विचारवंत, प्रधानमंत्री, वेतन मंडळ गोंयांत येतात तेन्ना तांकां मेळपा खातीर गुजान एकवटान हे पयलीं जाल्ल्या वावराची माहिती विखुरिल्ल्या पानांनी मेळटलीच, चुको जाल्यार माफ करचें, आमी सांगतात, तुमीय सांगचें.
गुजाच्या वांगड्यांचो आंकडो वाडटा ही बरी गजाल पूण तांकां नेमणूक पत्रां, पगार, प्रमोशन्स, पगारवाढ, सुटयो आनी कामाचे सुवातेर सुरक्षा मेळोवन दिवपा पासत प्रयत्न जावचे. गुजाच्या सगल्या वांगड्यांक तांच्या हक्कांची माहिती कामगारां खातीर वावुरपी अॅडवोकेटा कडल्यान दिवपाक जाय. वेतन मंडळ शेणलां, सगलेच कंत्राटार पूण तातूंतल्यान लाव कसो मेळोवचो हेंय पत्रकार, दिसाळीं वा व्हिजुवल मिडियांतले कर्मचारी, फोटोग्राफरांनी शिकपाक जाय.
पत्रकार वेतन आयोग, नवें पत्रकार वेतन मंडळ कित्याक जाय? पत्रकारितेक प्रतिश्ठा, विश्वासार्हता मेळोवन दिवपा पासत. केंद्र सरकारान पयलींच्या कायद्यांनी बदल केल्यात, येवजण्योय जाल्यात पूण पत्रकारां खातीर आशिल्ल्या कायद्यां विशीं सुचोवण्यो जावनय अधिसुचोवण्यो ना तें कित्याक? गोंयच्या मुख्यमंत्र्यांच्या फाटल्यान लागल्यार, निवेदनां दिवन केंद्रीय कामगारमंत्री, प्रधानमंत्र्या मेरेन ते पावयल्यार जैत कित्याक मेळचें ना? फाटल्या सप्तकांतल्या विखुरिल्ल्या पानांतली कवी संजीव वेरेंकाराची कविता श्रमीक पत्रकारितेचो खांबो कोसमेता ही शिटकावणी दिवपी?
राज्य माहिती हक्क आयोगार पाविल्ले संजय ढवळीकार हे गोंयचे पयले पत्रकार, गुजाचे वांगडी, सरचिटणीस हें सांगपाक गुज संघटणेक अभिमान दिसचो.

सुहासिनी प्रभुगांवकार
9881099260