भांगरभूंय | प्रतिनिधी
– ऑगस्टांत इंचांचो शेंकडो हुपपाची शक्यताय
– पावसान घेतला विसव
– आयज, फाल्यां पावस ना
– बुधवारा, बिरेस्तारा येलो अलर्ट
भांगरभूंय । प्रतिनिधी
पणजी : जुलयांत पावसान दर दिसा नेटाची हाजेरी लायिल्ल्यान पोरूं परस अंदूं पावसाचें प्रमाण आतां मेरेन 18 इंचांनी चड आसा. पोरूं (2022) जुलय मेरेन पावस 79.29 इंच (2014.1 मिमि) आशिल्लो. अंदूं आतां मेरेन तो 97.32 इंच (2472.1 मिमि) आसा. हें प्रमाण 18 इंच (458 मिमि) चड आसा. सरासरीचो विचार केलो जाल्यार पावसाचें प्रमाण 28.1 टक्के चड आसा. गोंय हवामान खात्याचे नोंदींतल्यान ही म्हायती मेळ्ळ्या.
सप्तकभर धुमशेणां कांडले उपरांत पावसान शेनवारच्यान विसव घेतला. आयतारा पावस नाशिल्ल्यांतूच जमा आशिल्लो. सोमारा आनी मंगळारा पावस आसचो ना, असो हवामान खात्याचो अदमास आसा. बुधवारा आनी बिरेस्तारा हवामान खात्यान येलो अॅलर्ट जारी केला. पावस इंचांच्या शेंकड्याच्या हुमऱ्यार आसलो तरी आतां ताचें प्रमाण उणें जाल्ल्या कारणान शेंकडो हुपपाक तो कांय दीस काडटलो, अशी स्थिती आसा. पोरूं 10 सप्टेंबराक पावसान इंचांचो शेंकडो हुपिल्लो. अंदूं ऑगस्टांत म्हणल्यार म्हयन्या पयली इंचांचो शेंकडो पावस हुपपाची शक्यताय आसा.
अंदूं पावसाक उसरा सुरवात जाली. मॉन्सून 11 जूनाक पाविल्लो, तरी लेगीत पयले 10 दीस पावस नाशिल्लोच. 22 जून उपरांत पावसाक सुरवात जाली. जून सोंपप मेरेन पावस पडटालो तरी लेगीत जूनांत पावसाचो उणाव आशिल्लो. जुलयांत मात सेगीत पावस पडलो. उटंगाराच्या पावसाक लागून घराचेर झाडां पडपा सयत ल्हान व्हड अपघात जाले. पावसाच्या धुमशेणाक लागून उजो पालोवपी दळाच्या जवानाक मातूय विसव मेळ्ळो ना. साळावली सयत सगळीं धरणां उपाट भरून व्हांवपाक लागलीं. उणाव भरून काडपा सयत पावस इंचांचो शेंकडो पुराय करपाच्या हुमऱ्यार पावला. सांगें आनी केपें ह्या वाठारांनी आतां मेरेन 100 इंचां परस चड पावस जाला. सगळ्यांत चड पावसाची नोंद 28 जूनाक (142.5 मिमि) नोंद जाली. जुलयांत 131.2 मिमि वयर दिसाक पावस पडूंक नाशिल्लो तरीय दर दिसा 3 इंचां परस चड पावस पडलो. हाका लागून पावसाचें प्रमाण वाडलें.
दोन दीस पावसान विसव घेतिल्ल्या कारणान ताणें ताचो जुलयांतलो इंचांचो शेंकडो चुकलो. अरबी दर्यांतल्या उण्या दाबाच्या पट्ट्याचो प्रभाव आतां पयस जाला.
आतां मेरेनचो पावस (मिमिंत)
म्हापशें 2466.2
पेडणें 2431.4
फोंडें 2518.4
पणजी 2328.6
पोरणें गोंय 2344.0
सांखळी 2432.2
काणकोण 2370.7
दाबोळी 2131.8
मडगांव 2465.1
मुरगांव 2068.2
केपें 2741.2 सांगें 2872.4
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
