‘म्हादय प्रवाह’ अध्यक्षपदाचेर पी. एम. स्कॉट
भांगरभूंय | प्रतिनिधी
पणजी ः म्हादय उदका वाद लवादान 14 ऑगस्ट 2018 दिसा गोंय, कर्नाटक आनी महाराष्ट्र ह्या तीनय राज्यांक म्हादय न्हंयेंचें उदक वांटलें. हाचे प्रमाण दरेका राज्याच्या उदकाच्या वापराचेर नदर दवरपाक म्हादय जल वेवस्थापन प्राधिकरण म्हळ्यार ‘म्हादय प्रवाह’ स्थापन केल्लो. आतां केंद्रीय जल शक्ती मंत्रालयान ह्या प्राधिकरणाचेर पी. एम. स्कॉटाची नेमणूक केल्या. बिरेस्तारा मंत्रालयान हो आदेश जारी केला. हे समितीचो कार्यकाळ तीन म्हयने आसतलो.
मुख्यमंत्री डॉ. प्रमोद सावंत हांणी विधानसभा अधिवेशनाच्या शून्य वरांत ही म्हायती सभाघराक दिली. अशोककुमार व्ही समितीचे सचीव जाल्यार वीरेंद्र शर्मा वांगडी आसतले, अशेंय मुख्यमंत्र्यान स्पश्ट केलें.
म्हादय लवादान 14 ऑगस्ट 2018 दिसा हो म्हत्वाचो निर्णय जाहीर केल्लो. ते प्रमाण गोंयाक 24 टीएमसी, कर्नाटकाक 13.42 टीएमसी आनी महाराष्ट्राक 1.3 टीएमसी उदक दिल्ले. तशेंच कर्नाटकाक दिल्ल्या 13.42 टीएमसी उदकांतल्यान 5.5 टीएमसी उदक कर्नाटकाक म्हादय व्हाळांत वापरचें पडटले. ह्या निकाला उपरांत कर्नाटक आनी महाराष्ट्र ताची योग्य अंमलबजावणी करतले काय ना हो प्रस्न गोंयान उबो केल्लो. हाचेर उपाय म्हणून 27 मे 2023 दिसा केंद्रीय उदका वीज आयोगान गोंयचे मागणे प्रमाण ‘म्हादई प्रवाह’ प्राधिकरणाची थापणूक केली. ताचें मुखेल कार्यालय गोंयांत आसतलें. आयज ताची समिती स्थापन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
