भांगरभूंय | प्रतिनिधी
पणजीः कोंकणी लार्ज लँग्वेज मॉडेल (एलएलएम) हें फकत एक भाशांतर करपी साधन न्हय, तर तो नागरिकांक केंद्रस्थानी दवरून तयार केल्ल्या धोरणाचो एक मुखेल खांबो आसा. कोस्टल अँड एन्वायरमेंटल एआय सेंटर ऑफ एक्सलन्स, पर्यटन, नुस्तेंमारी आनी शेतकाम ह्या क्षेत्रांक जोडपी डिजिटल यंत्रणेंत एकात्मीक सुविधा दिवपा खातीर कोंकणी एलएलम डिजिटल संरचनेंतलो मुखेल घटक आसा, अशी म्हायती गोंय एआय धोरण दस्तावेजांतल्यान मुखार आयल्या.
एआय धोरणांत मांडिल्ल्या मुद्यां प्रमाण गोंय आपल्या खाशेल्या पर्यावरणीय आनी संस्कृतीक वळखीक उर्बा दिवपा खातीर सुसंगत अशी एआय प्रणाली उबी करता.
गोंय सरकारान कोंकणी एलएलएम विकसीत करपाची घोशणा करून गोंयच्या डिजिटल मळार एक नवी दिका दिल्या. स्वताच्या प्रादेशीक भाशे खातीर कोंकणी एलएलएम हो खासा एआय उपक्रम सक्तीचो करपी गोंय हें देशांतलें एकमेव राज्य थारलां. आपली संस्कृतीक वळख सांबाळपा खातीर अद्ययावत तंत्रगिन्यानाचो वापर करप हो कोंकणी एलएलमचो हेत आसा.
ह्या तंत्रगिन्यानाचो एक भाग म्हूण एप्रील २०२७ ते मार्च २०२८ ह्या काळांत एक खास ‘बहुभाशीय एआय पर्यटन सहाय्यक’ अॅप सुरू जातलें. कोंकणी एल.एल.एम. वरवीं हें अॅप खुपश्या भाशांनी सेवा दितलें. हातूंत थळाव्यो आनी राष्ट्रीय भाशा जशें की कोंकणी, हिंदी आनी इंग्लीश. आंतरराष्ट्रीय भाशा जशें की पुर्तुगेज, रशियन आनी जर्मन हांचो आसपाव आसतलो. ह्या उपक्रमाक लागून गोंयच्या पर्यटनाक एक नवी उर्बा मेळटली आनी पर्यटकांक गोंयच्या दायजाची वळख तांचेच भाशेंत करून घेवप सोंपें जातलें.
कोंकणी एल. एल. एम. हें ‘भाषिणी’, गोंय विद्यापीठ आनी थॉमस स्टीफन्स कोंकणी केंद्र हांच्या जोडपालवान आनी रीतसर सामंजस्य कबलाती वरवीं विकसीत जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
