भांगरभूंय | प्रतिनिधी
पणजी : पणजेच्या अटल सेतूचेर मंगळारा सकाळीं भिरांकूळ साखळी अपघात जालो. स गाडयो एकामेकाचेर आपटल्ल्यान बरोच बोवाळ जालो. रस्त्याचेर तेल पडिल्ल्यान हो अपघात घडिल्ल्याचो दुबाव उक्तायला.
ह्या अपघाताची म्हायती मेळटांच, पर्वरेच्यान रोखडीच थंय ऍम्बुलन्स आयली. ह्या अपघातांत कोणाकूच गंभीर दुखापत जावंक ना. मात कांय जाणांक बारीक दुखापत जाल्या.
रस्त्याचेर सगल्याक तेल पडिल्ल्यान निसर तयार जाली. हाका लागून चालकांचें वाहनावेल्यान नियंत्रण सुटिल्ल्याचो अदमास उक्तायतात. अपघाताची म्हायती मेळटांच पुलीस घडणुके सुवातेर पावले. अपघाताचें नेमकें कारण कितें? हाचो सोद पुलीस घेतात.
मजगतीं, हे घडणुकेक लागून अटल सेतूचेर कांय काळ येरादारी कोयंडी निर्माण जाली. नागरिकांनी वाहन चलयतना काळजी घेवपाचो उलो प्रशासनान मारलो. वाडपी अपघातांचे फाटभूंयेर वाहन नेम पाळून वाहन चलोवपाचो उलो येरादारी पुलिसांनी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
