भांगरभूंय | प्रतिनिधी
उमेदवार दवरपाचो ना, काँग्रेस सयत विरोधी पक्षांचो निर्णय
पणजी : राज्यसभे खातीर उमेदवार दवरपाचो ना असो निर्णय विरोधी पक्षांच्या आमदारांनी घेतिल्ल्यान भाजप प्रदेश अध्यक्ष सदानंद शेट तानावडे हांचे जैत निश्चीत जालां. मुख्यमंत्री डॉ. प्रमोद सावंत तशेंच हेर आमदारांचे हाजिरेंत तानावडे हांणी मंगळारा अर्ज सादर केलो.
राज्यसभा खासदार विनय तेंडुलकार हांचे खासदारकीचो कार्यकाळ 28 जुलयाक सोंपता. राज्यसभा खासदार वेंचपा खातीर 24 जुलयाक मतदान जातलें. भाजपाचे 28, अपक्ष 3 आनी मगोच्या 2 आमदारांचो तेंको भाजपाचे उमेदवार सदानंद शेट तानावडे हांकां आसा. भाजप समर्थक 33 आनी विरोधी पक्षांचे 7 आमदार आशिल्ल्यान वेंचणूक जाली तरी भाजप उमेदवारांचे जैत निश्चीत आशिल्ले. आतां विरोधी आमदारांनी उमेदवारूच दवरपाचो ना असो निर्णय घेतिल्ल्यान तानावडे हे बिनविरोध राज्यसभेचेर वचपाचे आतां निश्चीत जालां.
भाजप प्रदेश अध्यक्ष सदानंद शेट तानावडे हांच्या नांवाची बरोच तेप चर्चा आशिल्ली. फाटल्या म्हयन्यांत भाजपान तांच्या नांवाची रितसर घोशणा केली. हाचे उपरांत मंगळारा तांणी उमेदवारी अर्ज दाखल केलो. ह्या वेळार मुख्यमंत्री डॉ. प्रमोद सावंत तशेंच हेर मंत्री, आमदार हाजीर आशिल्ले.
विरोधकांच्या तेंक्या खातीर मुख्यमंत्र्यांनी मारिल्लो उलो
भाजप प्रदेश अध्यक्ष सदानंद शेट तानावडे हांचे राज्यसभा वेंचणुकेंत जैत निश्चीत आसा. विरोधी पक्षांनी उमेदवार उबो करिनासतना तांकां तेको दिवचो, असो उलो मुख्यमंत्री डॉ. प्रमोद सावंत हांणी केल्लो. ते उपरांत कांय तेंपान विरोधी पक्षांच्या आमदारांची बसका जाली. हे बसकेत उमेदवार दवरपाचो न्हय, असो निर्णय जालो.
पक्ष दिता ती जापसालदारकी
सांबाळ्ळ्याः तानावडे
आपूण पक्षाचो सामान्य कार्यकर्तो. आतां मेरेन पक्षान जी जापसालदारकी सोंपयल्या, ती आपणें सांबाळ्ळ्या. राज्यसभेची उमेदवारी आपणाक दिवपाचो निर्णय पक्षान घेतला. राष्ट्रीय अध्यक्ष जे. पी. नड्डा, केंद्रीय गृहमंत्री अमीत शाह हांचे कडेन आपली चर्चा जाल्या. पक्ष दिता ती जापसालदारकी सांबाळपाचो म्हजो यत्न आसतलो, अशें सदानंद शेट तानावडे हांणी उमेदवारी अर्ज सादर केले उपरांत सांगलें.
राज्यसभा वेंचणुके विशीं विरोधी पक्षां मदीं सामसूम आशिल्ली. हाका लागून विरोधी पक्ष उमेदवार दवरतले काय ना, हे विशीं दुबाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
