भांगरभूंय | प्रतिनिधी
दूरदर्शन गोंयांत पावचे आदीं आनी उपरांतय आकाशवाणीचें म्हत्त्व कमी जालें ना. देशांतल्या, थळाव्या साहित्यिकांची एक पिळगी आकाशवाणी वयल्यान घडली हें सत. बरोवपी, अधिकारी, खबरांकार म्हणल्यार आकाशवाणीचें बळगें. आकाशवाणीचो नवो अवतार जेन्ना नॅशनल मिडियांतल्यान पळोवंक मेळटा तेन्ना पायलेक पंचवीस हे ओपारी प्रमाण जल्माक आयिल्ले चॅनेलूय घुस्पतात. वाचपी, आयकुपी, पळोवपी घुस्मटतात. घुस्मटिल्ल्यान राजकी, दिसाळ्यांचे, भुंयेंतले भुंयकांपय जातात. भूंयकांपातल्यान खबरांकाराक एके खबरेंतल्यान पंचवीस खबरोय मेळटात पूण त्यो घेवपाची, सोदपाची, आयकुपाची वाचप्यां मेरेन पावोवपाची तांक आसपाक जाय. सर्तीच्या ह्या युगांत जेन्ना उटंगाराचो पावस पडटा तेन्ना व्हड राज्यांत राजकी भुंयकांप जाल्यार? राजकारणांतल्या खबरांच्या पावसांत मोसमी पावसाचोय उटंगार लिपता तेन्ना ल्हानशी खबर पयल्या, दुसऱ्या पानार दिवचीच.
खबरो, लिखाण टवटवीत आसपाची जतनाय घेवप हें दिसाळ्यां मुखारच न्हय व्हिज्युअल, इलॅक्ट्रॉनीक मिडिया मुखार चॅलेंज (आव्हान) आसा. माफ करात, पणजे कोंकणी शाळा नाशिल्ल्यान एका तेंपार तुमकां आमकां प्राथमीक – मुळावें शिक्षण मराठी भाशेंतल्यान घेवचें पडलें. माध्यमीक शाळेंत सगले विशय इंग्लीश, तिसरी भाशा मराठी. तिचें मुळावण चड बळिश्ट करपाचें काम आठवे पासून गंधे टिचरीन केलें, घरा उलोवप कोंकणीच, ती आमची आवयभास. कोंकणीक राजभास पांवडो फावो जातकीच कोंकणी मुळावें शिक्षण दिवपी शाळाय जाल्यो, अंदूं तर शाळांची संख्या वाडपाचें चिन्न दिसता, शिक्षकय आसात, उच्च शिक्षणय कोंकणींतल्यान मेळटा. कोंकणी मुळाव्यो शाळा गांवागांवांनी पावोवपाचें आव्हान (आवाहन – विनवणी, अपील न्ही) आयजय सरकारा मुखार आसा. घराघरांतल्यान कोंकणीचें मुळावण घालपाक आई बाबा, माँ पापा घरांत आसतात खंय? घरांत आशिल्ल्या आजी, दादी, नानीचें चॅटिंग, धर्म अधर्मय चॅटिंगाक लागना. तांकांच कित्याक तुमकां आमकांय मोबायल हातांत घेतले बगर, पळयले बगर सकाळ जाता? घड्याळ मोबायलाचेर आसता, भुरग्यांय शिक्षणा खातीर मोबायल वापरतात, एक दीस नो मोबायल दीस सप्तकांतलो पाळ्ळ्यार? पुस्तकां, दिसाळीं हातांत घेवन वाचप म्हत्वाचें. आपलेंच दिसाळें सकाळीं च्या घेतना वाचपाक पत्रकारांनी विसरचें न्हय. वाचनांतल्यान गिन्यान मेळटा, रोखडी, शांत न्हिदूय पडटा, अणभव घेयात. राजकारण पत्रकारांची न्हीद खळयता.
उदेंतेक, सकाळीं, मध्यान रातीक सोपूत घेवप गोंयांतल्यान सुरू जाले, पुलावय बांदलो. भूंयकांप तेन्नाचो पावरफूल सिनियरांचो, आयज तांची पावर सोंपल्या? कुडीन क्षीण जाले तरी सिनियरांचें चलप (पांयांचें आनी विचारांचें) तांकां शक्तीमान करता. तातूंतल्यान आनीक भूंयकांप, पांयांपोंदचे भुंयेंतल्यान की राजकारणांतले जातले ताचो अदमास येता. राजकी भुंयकांप जातात तेन्ना पत्रकारांनी दिसाळ्यांचें धोरण पाळचें पडटा. भुंयकांप राजकी, पांयांपोंदचे जमनींतल्यान, दिसाळ्यांनी हे आदींय जाल्ले त्यो काणयो विखुरिल्ल्या पानांनी मर्याद गोंयां पुरतीच दवरून तुमी आमी मांडुया. भूंयकांप – राजकी वा भुमींतले जातना आनी उपरांत पत्रकारांक रात दीस नासता, राष्ट्रीय दिसाची सुटी आसतनाय दिसाळें वाचप्यांक दिवचें पडटा. भूंयकांप केन्ना केन्नाय विधायकय आसतात, अमृतकणय शिंपडपी. महाराष्ट्रांतलो राजकी भुंयकांप दिल्ली मेरेन पावपा खातीर, इनामां मेळोवपा पासत जाला? हें फुडारांत होल्मतलें. भुंयकांपाचे संकेत पावरफुल्ल मिडियांतल्यान मेळटात, कांय वेळार गुपीतय दवरचे पडटात.
भुंयकांपाची सुलुस चिमण्यो, सुकणीं, कावळेय दितात, चुट्टे वरी सोरपांक बोल्सांत घालून दवरप ना हें पत्रकारांनी मतींत दवरचें. मंत्र वरिश्ठ पत्रकार बालाबाब गावणेकार हांणी आमकां तुमकां दिल्लो लॅण्डलायनी वयल्यान. सुकण्यांच्यो, दोंगराच्यो, म्हादयच्यो काणयो सांगपी अकस्मात पत्रकार तयार करपाची भास खबरांकार विश्वनाथ नेने कित्याक करतात? मिडिया स्कूल, हायस्कूल ना? पत्रकारांनीच न्हय जाल्यार विधायकांनी (आमदार, खासदारांनी) विधानसभेंतय हांसपाक जाय, राजभाशेंतल्यान मुळावें शिक्षण दिवपाक सरकार गंभीर आसा की फकत भास वयलेचाराची तें एकवटान पेंगट बांदल्यार पावसाळे विधानसभेंत कळटलेंच. आयज ना जाल्यार केन्नाच ना, वेंताक चुकल्यार वावांक चुकतले हें सरकारान लक्षान दवरचें. ध्येय एकच राजभाशेंतल्यान शिक्षणाचें मुळावण घालपाचें. कायदो आसा, यंत्रणाय आसा, कळाव कित्याक? भुंयकांप जाल्यार, जातना आनी मागीर कायदो कितें सांगता तें तोंडपाठ जावपाक जाय राजभाशेंतल्यान. मन की बात एक देश एक कायदो जाल्यार प्रस्न विचारपी रेडिमेड नासचे, समान नागरी कायदोय भासाभाशेंतल्यान जावचो ही मोख सरकारा मुखार आसची. पंचायत, जिल्लो परिशद म्हापालिका गोंयांत आसात, पंचायतीक घरां मेळ्ळ्यांत, म्हापालिकाय नव्या घरांत वचपाची आसा, जिल्लो पंचायतीचें कितें? जिल्लो, पंचायतींक अधिकार दिवपा खातीर नेटाची मागणी परतून जावची. फाटल्यान लागले बगर कायदो चालीक लागना, उत्तर जिल्लो पंचायत अध्यक्ष सिद्धेश नायक तें
करपाक सक्षम आसात. फुडले
विधानसभेर पावपा पासत तांणी आतां सावन कामाक लागचें, अध्यक्षपद सांबाळून तेंय करपाक कितें हरकत आसा, ही इज द मास्टर (मास्तर न्हय, दिसाळ्यांतलें, मिडियांतलें मस्टर न्ही). मस्टरां गेलीं, हजेरीची नोंदय बोटांनी. दिसाळ्यांत येवपा खातीर भौभाशीक, भौमाध्यमी कोंकणी, कुशळटाय, अणभव, पदवी मेरेन शिक्षण जाय.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
