लोकसभा वेंचणूक तयारे खातीर काँग्रेसाची काणकोणात बसका

भांगरभूंय | प्रतिनिधी

भांगरभूंय । प्रतिनिधी
काणकोणः  काणकोण गट काँग्रेसाची  बसका घेवन प्रदेश काँग्रेस समितीन लोकसभा वेंचणुकेची तायरी सुरू केली. श्रीस्थळ पंचायत सभाघरांत  बुधवारा जाल्ले हे  बसकेची येजमानकी गट काँग्रेसचाचो अध्यक्ष आबेल बॉर्जिस हाणे चलयली. प्रदेश काँग्रेस समिती अध्यक्ष अमित पाटकार आनी दक्षीण गोंयचो खासदार  फ्रान्सिस सार्दिन हांणी ह्या वेळार काँग्रेस वावुरप्यांक मार्गदर्शन केले.
दक्षीण गोंय लोकसभा मतदारसंघांतले मतदार काँग्रेस पक्षान वटेन सदांच रावतात. पक्षाच्या ह्या बालेकिल्ल्यांत काणकोणचे मतदार काँग्रेस पक्ष उमेदवारा फाटल्यान रावतले हातूंत कसलोच दुबाव ना. 2024चे लोकसभा वेंचणुकेंत ह्या मतदारसंघांत जैत मेळोवपा खातीर  काणकोणचे मतदार आमच्या उमेदवाराक व्हडली आघाडी मेळोवन दितले असो विस्वास पाटकार हाणे उक्तायलो.
लोकसभा वेंचणुकेचे तयारे खातीर किदें करपाक जाय हे विशीं पाटकार आनी सार्दिन  हांणी बसकेंत जायत्यो सूचोवण्यो केल्यो. काणकोण मतदारसंघांत दरेका बुथार दरेकी पांच वांगड्यांच्यो समित्यो तयार करपाचें बसकेंत थारले. बूथ पांवड्या वयल्या फुडाऱ्याच्या मार्गदर्शना खाला ह्यो समित्यो काम करतल्यो. तळागाळ्यातंल्या मतदारां कडेन संपर्क सादपाचें काम ह्या समित्या कडेन दिलां.
बसकेक प्रदेश काँग्रेस समितीचे उपाध्यक्ष सुभाष फळदेसाय, सरचिटणीस एव्हरसन वालीस आनी मोरेन रेबेलो, काँग्रेस पक्षाचे दक्षीण गोंय अध्यक्ष सावियो डिसिल्वा,  गोंय प्रदेश युवक काँग्रेस समितीचो उपाध्यक्ष वैष्णव पेडणेकार आनी हेर पदाधिकारी हाजीर आशिल्ले.