भांगरभूंय | प्रतिनिधी
दोन भांगराचीं, एक रुप्याचें आनी एक कांश्याचें
भाटी-सांगेचे सिया सरोदे हिणें बर्लिनांत चालू आशिल्ल्या 2023 च्या स्पेशल ऑलिंपिक संवसारीक गिमाळ्या खेळांत पॉवरलिफ्टिंग सर्तींत चार पदकां जिखून गोंय आनी भारताचें नांव संवसारांक गाजयलां. सियान वेगवेगळ्या देशांतल्या खेळगड्या आड सर्त करून डेड लिफ्ट आनी स्क्वेटांत दोन भांगरा पदकां, कंबायन्डांत एक रुप्या पदक आनी बेंच प्रेसांत एक कांस्य पदक मेळयलें.
युनिफायड फुटबॉल, फुटसाल, एथलेटिक्स, रोलर स्केटींग, बास्केटबॉल, जूडो, युनिफायड व्हॉलीबॉल आनी हॅंडबॉल अशा वेगवेगळ्या खेळांनी वांटो घेवपी २३ वांगड्यांच्या भारतीय पंगडाचो भाग आशिल्ल्या गोंयकार पंगडाचो सिया भाग आशिल्लें.
सियाक व्हिसा मेळोवपाक त्रास पडले. मागीर मुख्यमंत्री दो. प्रमोद सावंत , समाज कल्याण मंत्री सुभाष फळदेसाय आनी दक्षीण गोंय कलेक्टरान केल्ल्या हस्तक्षेपाक लागून सिया वेळार सर्तीक पावपाक शकलें.
तिचे वांगडा आनीक एक गोंयची पदक विजेती तानिया उल्हास उसगांवकार ही दिवचलच्या केशव सेवा साधना विद्यालयाची 15 वर्सां पिरायेची विद्यार्थीनी आशिल्ली. ताका 30 मीटर सरळ रांकेंत रोलर स्केटींग सर्तींत कांस्य पदक मेळ्ळें. तें 30 मीटर स्लॅलम सर्तींत वांटो घेतलें, थंय आनीक एक पदक मेळपाची आस्त आसा.
रिपोर्ट- क्लायव्ह आल्वारीस
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
