भांगरभूंय | प्रतिनिधी
पणजी: 2010 वर्सा कंत्राटदारा कडल्यान 15 हजार रुपयांची लांच घेतिल्ल्या प्रकरणांत उत्तर गोंय जिल्हो आनी सत्र न्यायालयान गोरवां सांबाळ खात्याचे आदले संचालक प्रवीण कुमार पटीदार हाका 1 वर्स सादी बंदखण आनी 35 हजार रुपया दंडाची ख्यास्त दिल्या. हे विशींचो निवाडो न्या. शैरीन पॉल हांणी जारी केला.
ह्या प्रकरणांत दक्षता खात्याच्या भ्रश्टाचार विरोधी पंगडान (एसीबी) 29 जून 2010 दिसा गुन्यांव दाखल केल्लो. ते प्रमाण ह्या प्रकरणांत दोडामार्ग (महाराष्ट्र) हांगासरलो कंत्राटदार विवेकानंद नायक हांणी कागाळ दाखल केल्ली. ताका गोरवां सांबाळ खात्या कडल्यान मोलें आनी कोपाड्डें हांगासरल्या फार्मा खातीर सुकें तण दिवपा खातीर 23,38,600 रुपयांचें कंत्राट मेळिल्लें.
ते प्रमाण नायक दोनूय फार्मा खातीर सुक्या तणाची पुरवण करतालो. ह्याच वेळार गोरवां खात्याचे आदले संचालक प्रवीण कुमार पटीदार हाणें नायक हांचे कडेन 24 जून 2010 दिसा संपर्क सादून 22 लाख रुपयांचें बील पास करपा खातीर 10 टक्के लांच मागली. ह्या वेळार जाल्ल्या उलोवपाचें रिकॉर्डींग करून नायक हांणी एसीबी कडेन कागाळ दाखल केली. उपरांत पटीदारान 28 जून 2010 दिसा परतून संपर्क सादून 2 लाख रुपयाचो धनादेश तयार आशिल्ल्याचें सांगून नायक हाका व्हरपाक सांगलें. त्या वेळार नायक हाणें 10 टक्के लांच दिवपाक न्हयकार दिलो.
उपरांत 29 जून 2010 दिसा 15 हजार रुपया दिवपाचें थारलें. ते प्रमाण थारिल्ल्या दिसा सांजवेळा 15 हजार रुपयांची लांच स्विकारतना एसीबीचे तेन्नाचे पुलीस निरिक्षक निलेश राणे हांच्या फुडारपणा खालच्या पंगडान पटीदार हाका रंगेहाथ धरलो. ह्या प्रकरणांत एसीबीन पटीदार हाचे आड भ्रश्टाचार प्रतिबंधक कायद्या खाला गुन्यांव दाखल करून अटक केली.
ह्या प्रकरणांत एसीबीन पणजेंतल्या उत्तर गोंय जिल्हो आनी सत्र न्यायालयांत आरोपपत्र दाखल केलें. ह्या प्रकरणांत सरकारी वकील नीता मराठे हांणी युक्तिवाद करून एसीबीची बाजू मांडली. न्यायालयान गोरवां सांबाळ खात्याचे आदले संचालक प्रवीणकुमार पटीदार हाका दोशी थारावन काल (बुधवारा) भ्रश्टाचार प्रतिबंधक कायद्याचें कलम 7 खाला स म्हयने सादी कैद आनी 10 हजार रुपया दंड. जाल्यार कलम 13 (1)(डी) एक वर्स सादी कैद आनी 25 हजार रुपयांच्या दंडाची ख्यास्त दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
