भांगरभूंय | प्रतिनिधी
करमलघांट अपघात प्रकरण
काणकोण: करमलघांट वांकडे मोणण हांगा हालींच मुंबयच्या अरूण गांधी ह्या तरणाट्याक मरण आयिल्लें. ह्या व्हॉल्तां वयलीं झाडां अनवळखी मनशांनी मारिल्ल्यानूच ही गाडी देगणांत पडिल्ल्यान तातूंत ह्या तरणाट्याक मरण आयलें. थंय झाडां आशिल्लीं जाल्यार इतलो व्हड अपघात घडचो नाशिल्लो, आनी ह्या अपघातांत कोणाकूच मरण येवचें नाशिल्लें. झाडां मारप्यांनी आपलो प्रताप दाखयलो, आतां थंयचें देगण पुरोवपाचोय प्रताप दाखोवचो अशी प्रतिक्रिया काणकोणचे समाजकार्यकर्ते शांताजी गांवकार हांणी दिली.
हें व्हॉल्त पुरोवपाचे नदरेन आपणे माती, टिप्पर, जेसीबी मशीन तशेंच सगले तरेची मजत करपाचें दाखयिल्लें. पूण हांव विरोधी गटांतलो नगरसेवक आशिल्ल्यान म्हजे विनंती कडेन आडनदर केली अशें काणकोण पालिकेचे नगरसेवक धिरज नायक गांवकार हांणी सांगलें.
काल (बुधवारा) राखणे वणत बांदपाच्या कामाक सुरवात जातली अशी आस्त काणकोणकारांनी बाळगिल्ली. पूण प्रत्यक्षांत थंय काम सुरू जालेंच ना. कंत्राटदार सी ए अहमदाच्या कामगारांनी रस्त्याचे कुशीक लांकडी खुटी मारून आनी अपघातग्रस्त वाठार म्हूण कळपा खातीर रिबीन तितलें बांदलें आनी कांयच केलें ना.
हे विशीं कंत्राटदार सी ए अहमदा कडेन संपर्क सादलो तेन्ना हो कठडो कसो बांदूं? बांदपा खातीर रानां खात्याची परवानगी गरजेची आसून ती मेळिल्ली ना. अशें सांगून हाचे पयलीं लेगीत आपले आड चार कागाळी केल्यात आनी म्हजे बांदकाम साहित्य लेगीत वेगळ्यावेगळ्या यंत्रणांनी जप्त केलां अशें अहमद हांणी सांगलें.
मजगतीं, ह्या अपघातग्रस्त वाठाराक काल काणकोणचे आदले आमदार विजय पै खोत आनी गोंयकार ह्या बिगर सरकारी संघटणेचे अध्यक्ष जेक फेर्नांडीस हांणी भेट दिली आनी ह्या अपघातग्रस्त सुवातेर राखणे कठडो ताकतिकेन बांदपचे नदरेन कंत्राटदाराक सांगलें. पूण कंत्राटदारान रानां खात्याच्या हरकत ना दाखल्या बगर कठडो बांदप शक्य नाशिल्ल्याचें सांगलें. उपरांत खोत हांणी राष्ट्रीय म्हामार्ग विभागाचे सहाय्यक अभियंते सागर शेट हांकां फोन करून फुडली उपाय येवजण आंखपाचे नदरेन आयज (बिरेस्तारा) सकाळीं 9.30 वरांचेर वांकडे मोणण हांगा हाजीर रावपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
