भांगरभूंय | प्रतिनिधी
भांगरभूंय । प्रतिनिधी
पोरणे गोंयः नावशी हांगच्या मरिना प्रकल्पा संबंदी कार्गवाल बांदकाम कंपनीक धाडिल्ली कारणा दाखय नोटीस फाटीं घेतिल्ल्याची म्हायती मुरगांब बंदर प्राधिकरणान (एमपीए) मुंबय उच्च न्यायालया दिल्ले फाटभुंयेर व्हो प्रकल्प परत सुरू करपाचो यत्न जाल्यार परत आंदोलन सुरू करपाची शिटकावणी रिव्होल्युशनरी गोवन्स पक्षाचो सान्त आंद्रेचो आमदार विरेश बोरकार हाणे दिल्या.
ह्या मरिना प्रकल्पा आड मुंबय उच्च न्यायालयाच्या गोंय खंडपिठान दाखल केल्ले याचिकेंत विरेश बोरकार तशेंच आरजीचो फुडारी मनोज परब प्रतिवादी आसात. कारणां दाखय नोटीस फाटीं घेवपाच्या एमपीएच्या निर्णयाक कायदेशीर आव्हान दितले. आमका आमची बाजू मांडपाक दोन सप्तकांची मुजत दिल्या. नावशी प्रकल्पाक आमचो विरोध आसा आनी हाच्या फुडेंय आसतलो अशें बोरकारान पत्रकारांक सांगलां.
उच्च न्यायालयाचो निर्णय आमचे आड लागल्यार प्रकल्पाक विरोध करपा खातीर लोकांक घेवंन रस्त्यार येवपाची शिटकावणी बोरकार हाणे दिल्या. नावशी हांगा जावपाक घातिल्ल्या मरिना प्रकल्पाक सान्त आंद्रें मतदारसंघांतल्या लोकांचो विरोध आसा. ताचो प्रतिनिधी ह्या नात्यान नावशीचो प्रकल्प परत सुरू करपाचे कसलेय यत्न जाल्यार हांव रस्त्यार येतलो आनी ताचो परिणाम कितेंय जाल्यार ताची म्हाका पर्वा आसची ना अशें बोरकारान पत्रकारांक सांगलें.
एमपीएन कारणा दाखय नोटीस फाटीं घेवपाचें थारायलां ताचे फाटल्यान कसलेय तरी कारस्थान आसपाव जाय. नोटीस फाटीं घेवपा फाटले खरें कारण अजून स्पश्ट जाल्लें ना. व्हो प्रकल्प जाल्यार दोनापावला तें आगशी मेरेन दर्यांतली वनस्पत आनी जलजीव ना नपयत जातले. व्हो प्रकल्प म्हणल्यार पर्यावरणीय आपत्ती थारतलो इतलेंच न्हय जाल्यार दोनापावला, ओशेल, कारका, नावशी, बांबोळी, शिरिदांव, आगशी आनी हेर कडल्यान पारंपारीक नुस्तेमाऱ्यांच्या पोटार पाय दवोरपी व्हो प्रकल्प आसा अशें ताणे सांगलें.
मरिना प्रकल्पाचें काम सुरू केल्यार पारंपारीक नुस्तेमार तशेंच थळावो लोक ताचे आडचें आंदोलन परत सुरू करतले आनी जे परिणाम जातले ताका सरकार आनी मुरगांव बंदर प्राधिकरण जापसालदार आसतलें अशें बोरकारान सांगलां.
लोकभावने कडेन खेळनाकात
मजगतीं, आम आदमी पक्षाचो फुडारी रामाराव वाघ हाणे तशेंच नावशी प्रकल्पाक सुरवेक सावंन विरोध करपी अॅड सुरेश पालकार हांणी नावशी मरिना प्रकल्प परत सुरू करपाक विरोध केला. काम परत सुरू केल्यार आंदोलन परत सुरू करचें पडटलें अशी शिटकावणी रामाराव वाघ हांणे दिल्या. कारणां दाखय नोटीस फाटीं घेवपाच्या एमपीएच्या निर्णया खातीर ताणे अजाप उक्तायलें.
एमपीए, केंद्र आनी राज्य सरकारान लोकाचे भावने कडेन खेळचें न्हय. ताचे परिणाम वायट जातले अशें तांणे म्हणलां. दोनापावला तें आगशी व्हो दर्या वाठार पर्यावरणाचे नदरेन सामको संवेदनशील आसा. मरिना प्रकल्पाक लागून तो काबार जातलो. मरिना प्रकल्प कोणाकूच परवडपा सारको ना. नुस्तेमारांचो वेवसाय ताका लागून बंद जातलो. कसलोय निर्णय घेवपा पयली मुरगांव बंदर प्राधिकरणान थळाव्या लोकांचो विचार करपाक जाय. खरें तर मरिना प्रकल्पाचो विशय सोपला. तो परत उप्रासून काडल्यार लोकां सामकार आंदोलन करपा शिवाय दुसरो पर्याय आसचो ना अशे रामारावान सांगलें.
लोकांनी केल्ल्या आंदोलनाक लागून नावशी मरिना प्रकल्पाचें काम बंद केल्लें. ते परत सुरू करपाचे यत्न जाल्यार ओगी रावचे ना. लोकांचेर हो प्रकल्प थापचे पयलीं मुरगांव बंदर प्राधिकरणान शंबर फावट विचार करचो अशें अॅड सुरेश पालकारान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
