भांगरभूंय | प्रतिनिधी
मडगांव: कुडटरी भाजपा मंडळान आयोजीत केल्ल्या भाजप कुडटरी मतदारसंघ जोड मोर्चाच्या संमेलनाक बरो प्रतिसाद मेळ्ळो. कुडटरींत 20 वर्सां सावन प्रलंबीत आशिल्लीं कामां जायत आसात. भाजपाचें काम घरा कणकणीं व्हरपाचो निश्चेव केला.
मायना कुडटरींतल्या अलेग्रिया हॉलांत आयोजीत केल्ले कार्यावळींत दक्षीण गोंयचे आदले खासदार नरेंद्र सावयकार, कुडटरी भाजप प्रभारी शर्मद रायतूरकार, भाजप एसटी फुडारी अँथनी बार्बोझा, डॉ. स्नेहा भागवत हांचीं उलोवपां जालीं. हे कार्यावळीक नीळकंठ एकावडे, मेहबूब मकानदार, मॅन्युएल रॉड्रिगीश, राणी डिकुन्हा आनी बेला डिसोझा आनी हेर मानेस्त हाजीर आशिल्ले.
अँथनी बार्बोझा हांणी कार्यावळीक व्हड संख्येन समर्थक आनी कार्यकर्ते हाजीर राविल्ले खातीर समाधान उक्तायलें. मुख्यमंत्री डॉ. प्रमोद सावंत हांच्या फुडारपणा खाला भाजप बरें काम करता. कुडटरी मतदारसंघांत विवीध विकासकामां राबयिल्ले खातीर तांणी मुख्यमंत्री, मंत्री, प्रदेशाध्यक्ष सदानंद शेट तानावडे आनी फुडाऱ्यांचे उपकार मानले.
राय गांवांतल्या विवीध नाल्यांची नितळसाण, गाळ काडप आनी 25 वर्सां सावन दुर्लक्षीत आशिल्ल्या रस्त्याच्या डांबरीकरणाचें काम पुराय केल्ल्याची उदाहरणां तांणी दिली.
गोंय सरकार दरेक नागरिकाक नितळ, सुरक्षीत आनी विकासात्मक शासन दिवपाच्या उद्देशान वाटचाल करीत आसा. भाजप सरकाराचो जातीयवादाचेर विस्वास ना. सगल्यांक जात आनी पंथ विचारांत घेनासतना समान मानता अशें बार्बोझा हांणी म्हणलें.
केंद्र सरकार जे तरेन काम करता आनी वाडट्या जनआवाहनाचो विचार करून भाजप सरकार मोटे इनिंगे खातीर आयला अशें स्पश्टपणान दिसून येता. फुडल्या वर्सा जावपी लोकसभा वेंचणुकेंत पक्षाचे उमेदवार वेंचून हाडपा खातीर एकवटान रावून पक्षाक मजत करपाचें आवाहन शर्मद रायतूरकार हांणी केलें.
फाटले वेंचणुकेंत हार स्विकारून लेगीत बार्बोझा लोकांच्या कामां खातीर कार्यरत आसात. कुडटरी मतदारसंघांत भाजपाक घटमूट करपा खातीर मंडळान प्रयत्नशील रावचें. लोकसभा वेंचणुकेंत भाजपाचें कमळ नक्कीच फुलतलें अशें नरेंद्र सावयकार हांणी आत्मविस्वासान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
