भांगरभूंय | प्रतिनिधी
भांगरभूंय । प्रतिनिधी
म्हापशेंः कळंगुटे हांगा पुलीस स्टेशना सामकार मुखेल रस्त्यार उबारिल्लो छत्रपती शिवाजी म्हाराजांचो अश्वारूढ पुतळो कळंगुटे पंचायत मंडळान अवैध थारायला. तो येता त्या धा दिसांत काडचो, असो आदेश मंडळान कळंगुटेच्या शीव स्वराज्य संस्थेक तशेंच भौशीक बांदकाम खात्याक दिला. ह्या आदेशाची प्रत गोंय राज्य पायाभूत साधन सुविधा मंडळाक लेगीत धाडल्या.
फाटल्या 3 जूनाक रातयां कळंगुटे- साळगांव मार्गार कळंगुटे पुलीस स्टेशना सामकारच्या जंक्शनाचेर शीव स्वराज्य संस्थेन हो पुतळो उबारिल्लो. ते खातीर कसलीच परवानगी घेतली ना. ताका लागून तो बेकायदेशीर आशिल्ल्याचें स्पश्ट करून कळंगुटे पंचायत मंडळान पंचायरराज कायद्याच्या 66 कलमा खाला तो काडपाचो आदेश दिला. ज्या रस्त्यार हो पुतळो उबारला तो मुखेल जिल्हो मार्ग आसा. ह्या जंक्शनार हायमास्ट दिवो उबारपाचो आशिल्लो मात संस्थेन आपूण जावंन पुतळो उबारला असो दावो पंचायत मंडळान केला.
सर्वोच्च न्यायालयाच्या आदेशा प्रमाण अशे तरेन रस्ताचे मदींप पुतळो उबारपाक जायना. ताका लागून व्हो पुतळो बेकायदेशीर आसा. सर्वोच्च न्यायालयाच्या आदेशाचें उल्लंघन करपी आसा अशें पंचायत मंडळान स्पश्ट केलां. फुडल्या 10 दिसांत पुतळो काडलो ना जाल्यार पंचायत मंडळ तो काडटले तशेंच पुलीस कागाळ करतले असें पंचायत मंडळान सांगलां. पुतळो उबारपाक पंचायती कडल्यान परवानगी घेतली ना. सर्वोच्च न्यायालयाच्या आदेशा प्रमाण तो काडपाक सांगलां अशें सरपंच जोजफ सिकेरान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
