भांगरभूंय | प्रतिनिधी
भांगरभूंय । प्रतिनिधी
काणकोणः वाकडेंमोणण हांगा करमलघाटांत सोमाराक दनपारां जाल्ल्या अपघातांत मुंबयच्या एका विद्यार्थ्यांक आपलो जीव वोगडावचो पडलो. अंधेरी- मुंबय हांगच्यान आयिल्ले पांच जाण मडगांवच्या रेन्ट अ कार गाडयेन वतना करमलघाटांल्या अशीर रस्त्यार तांचे गाडयेचो धपको एका टॅन्कराक बसून गाडी देंगणांत कोसळ्ळी.
पांच जाण आयतारा गोंयांत आयिल्ले. सोमाराक पाळोळे- काणकोणच्यान मडगांवां वतना दनपारां 3.15च्या सुमाराक करमलघाटांत अशी रस्तो आनी व्हल्तार वांकडेंमोणण हांगा मडगांवच्यान कारवारा वचपी एका टॅन्काराक ताचे गाडयेचो धपको बसलो आनी गाडी सुमार 10 मीटर खोल देंगणांत पडली. हातूंत वरूण गांधी (19) व्हो तरणाटो जाग्यारूच मेलो. जाल्यार मेद पाटवा (19), सिया चोरडिया (19) आनी सेहावी लोढा जखमी जालें. ताकां काणकोणच्या सामाजीक हॉस्पिटलांत मुळावे उपचार करून उपरांत मडगांवच्या जिल्हो हॉस्पिटलांत धाडलें. काणकोणचो पुलीस निरीक्षक चंद्रकांत गांवस फुडलो तपास करता.
करमलघाटांत अपघात जावचे न्हय हे खातीर फावो ती उपाय येवजण करपाची लोक मागणी करीत आसात. वाकडेंमोणण ह्या व्हल्तार अपघात जावचे न्हय हे खातीर बेगोबेग उपाय येवजण करपाक जाय अशें काणकोणचो आदलो उपनगराध्यक्ष दिलीप केंकरें हाणे सांगलां. तीन म्हयन्यां पयली ह्या व्हल्तार आशिल्ली झाडां अनवळखी लोकांनी रातयां मारून वडयिल्लीं. ही झाडां आशिल्लीं जाल्यार गाडी देंगणांत पडनाशिल्ली. सोमाराक जाल्ल्या अपघाताची दखल घेवंन बांदकाम खात्याान थंय संरक्षक उपाय येवजण करपाक जाय अशें समाज वावुरपी शांताजी गांवकारान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
