भांगरभूंय | प्रतिनिधी
गोंय-मुंबय मार्गार धांवपी गाडयेचो प्रधानमंत्र्या हस्तुकीं शुभारंभ
मडगांव: प्रधानमंत्री नरेंद्र मोदी हांचे हस्तुकीं व्हिडियो कॉन्फरसिंगा वरवीं 26 जून दिसा गोंयांतल्या पयल्या वंदे भारत एक्सप्रेसीक पाचवो बावटो दाखयतले. तशेंच बंगळुरू हुबळी धारवाड, पाटणा रांची, भोपाळ इंदोर आनी भोपाळ जबलपूर ह्या मार्गा वयल्यो वंदे भारतूय ह्याच दिसा लोकार्पण करपाचें थारायलां.
वंदे भारत ही सेमी हायस्पीड रेल्वे कोंकण रेल्वे मार्गार धांवपी पयली जाल्यार महाराष्ट्रांतली चवथी वंदे भारत थारतली. गोंय मुंबय मार्गार धांवपी वंदे भारत गाडी आठ डब्यांची आसतली. हे गाडयेक गोंयांत दोन स्टेशनांचेर थांबो आसतलो. जाल्यार महाराष्ट्रांत धा स्टेशनांचेर ही गाडी रावतली. ऑनबोर्ड वायफाय सेवा, बायो टॉयलेट, मॉडर्न पँट्री आनी सुरक्षितायेची अत्याधुनीक सेवा आसतली. ही गाडी 580 किलोमिटराचें अंतर साडेसात वरां भितर पुराय करतली. कोंकण रेल्वे मार्गार धांवपी ही सगल्यांत वेगवान रेल्वे आसतली.
प्रधानमंत्र्याच्या ‘मेक इन इंडिया’ आनी आत्मनिर्भर भारताचे नदरेंतल्यान अत्याधुनीक वंदे भारत एक्स्प्रेसीक लागून मुंबय-गोंय मार्गा वयली कनेक्टिव्हिटी सुदारतली. ह्या वाठारांतल्या लोकांक गतीन आनी सुखकर प्रवास करपाचें साधन उपलब्ध जातलें.
साडेसात वरां भितर गोंय ते मुंबय
वंदे भारत ही रेल्वे गाडी मुंबयतल्या छत्रपती शिवाजी महाराज टर्मिनस ते गोंयांतल्या मडगांव स्टेशना मजगतीं धांवतली. ह्या दोन स्टेशनांक जोडपी सद्याचे गतीन धांवपी रेल्वे गाडयेचे तुळेन वंदे भारत रेल्वे हो प्रवास सुमार साडेसात वरां भितर पुराय करतली. हाका लागून एक वर प्रवासाचो वेळ वाटावतलो.
स्वदेशी बनावटीची, संवसारीक दर्जाच्या सुविधांनी सुसज्ज आनी कवच तंत्रज्ञाना सयत अत्याधुनीक सुरक्षा वैशिश्ट्यां सयत आशिल्ली ही रेल्वे गाडी दोनूय राज्यांतल्या पर्यटनाक चालना दितली. वंदे भारत रेल्वेच्या शुभारंभाच्या निमतान मडगांव रेल्वे स्टेशनाक नवाे साज चडयला. वाठारांत नितळसाण केल्या आनी स्टेशनाचें नुतनीकरण करून रंग मारला.
मजगतीं, मेळिल्ले म्हायती प्रमाण गोंय-मुंबय वंदे भारत रेल्वे ही सप्तकांतल्यान स दीस धांवतली. ही सेवा शुक्रारा बंद आसतली. जाल्यार मॉन्सून काळांत ही एक्स्प्रेस तीन दीस सुरू उरतली. छत्रपती शिवाजी महाराजज टर्मिनस सावन गाडी सुटले उपरांत दादर, ठाणें, पनवेल, रोहा, खेड, रत्नागिरी, कणकवली, थिवी आनी मडगांव जंक्शनवर रावतली.
लोकार्पण सुवाळो लांबिल्ल्यान रेल्वे मुंबय
हाचे पयलीं वंदे भारत ह्या सेमी स्पीड गाडयेचो शुभारंभा 3 जून दिसा जावपाचो आशिल्लो. ओडिशांतल्या अपघाताक लागून हो सुवाळो लांबणेर पडलो. आतां हेर चार वंदे भारत गाडयां सयत मुंबय-गोंय मार्गा वयली गाडी 26 जूनाक सुरू जातली. सद्या तरी तशी म्हायती मेळिल्ली आसली तरी रेल्वे प्रशासना कडल्यान गाडयेचो शुभारंभ आनी वेळ हे विशींचें निश्चीत वेळापत्रक धाडिल्लें ना, अशी म्हायती कोंकण रेल्वेचे उपप्रबंधक आनी वरिश्ठ जनसंपर्क अधिकारी बबन घाटगे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
