संवसारांत मोदी हांचो सन्मान तो भारतीयांचो सन्मान

भांगरभूंय | प्रतिनिधी

पत्रकार परिशदेंत कृष्णा साळकार हांची म्हायती

मुरगांव: आयज संवसारभर प्रधानमंत्री नरेंद्र मोदी हांकां जो सन्मान मेळत आसा तो सन्मान म्हणल्यार भारतीयांचो आसा. भारत देशाक विश्वगुरू करपाची ताकद प्रधानमंत्री नरेंद्र मोदी हांचें मदीं आसा. भारतीय लोकांचें सपन हें नक्कीच पुराय जातलें. आमचो भारत देश शक्तीशाली जायत चल्ला. हें सगलें प्रधानमंत्री नरेंद्र मोदी हांचे उपलब्धीक लागून आशिल्ल्याचें वास्कोचे आमदार कृष्णा साळकार हांणी सांगलें.
प्रधानमंत्री नरेंद्र मोदी सरकाराचो 9 वर्सांचो कार्यकाळ पुराय जाला. 20 मे ते 30 जून 2023 मेरेन भारतीय जनता पार्टी सेवा सुशान आनी जनकल्याण, महा जनसंपर्क अभियान राबयता. हाचो नियाळ काल (बुधवारा) वास्को भाजपा मंडळा वतीन वास्कोचे आमदार कृष्णा साळकार हांणी पत्रकार परिशदेंतल्यान घेतलो.
पत्रकार परिशदेक भाजपाचे दाबोळी मतदारसंघाचे प्रभारी  जयंत जाधव, दाबोळी महिला मोर्चाच्या अध्यक्षा अनिता थोरात, नगरसेविका शमी साळकार, नगरसेवक अमेय चोपडेंकार, गिरीश बोरकार बी मानेस्त हाजीर आशिल्ले.
मुखार म्हायती दितना आमदार साळकार हांणी प्रधानमंत्री नरेंद्र मोदी हांच्या 9 वर्सांचे कारकिर्दीचेर उजवाड घालतना तांणी देशा खातीर आनी गोंया खातीर कसली उपलब्धी मेळोवन दिल्या हे विशींचें विश्लेशण केलें. तांणी म्हणलें, केंद्र सरकाराक लागून गोंयाक उपलब्धी प्राप्त जाली.
मुरगांव म्हाला खातीर वर्णापुरी ते हॅडलॅण्ड सडा 540 कोटींचो म्हामार्ग प्रकल्प पुराय जालो. वास्कोचो कदंब बस स्टॅण्ड रोखडोच चालीक लागतलो. जो बसपोर्ट म्हूण संबोदतले. वास्कोंतल्या मायमोळें तळ्याचो केंद्र सरकारा वतीन मास्टर प्लॅन तयार केला. तळ्याचो कायापालट जातलो. हें तळें वास्कोकारां खातीर भूषण थारतलें. केंद्र सरकाराचे मजतीन हाचे बगर अटल सेतू, जुवारी पूल, मोपा विमानतळ, आयुर्वेद हॉस्पिटल, मनोहर पर्रीकार म्हामार्ग अशे खूबशे विकास प्रकल्प गोंयाक केंद्रांतल्या मोदी सरकारा कडल्यान ह्या णव वर्सांच्या कारकिर्दींत प्राप्त जाल्यात. हाचे मुखारूय खूबशे प्रकल्प उपलब्ध जातले अशें साळकार हांणी सांगलें.
मोदी सरकाराचो णव वर्सांचो कार्यकाळ उपलब्धी आमी लोकां मुखार पुस्तकाच्या रुपान दवरल्या. जनसंपर्क अभियाना वरवीं लोकां कडल्यान बरे पैकी प्रतिसाद मेळत आसून, मोदी हांकां लोकांचे बरे पैकी सहकार्य मेळत आशिल्ल्याचें साळकार हांणी म्हणलें.
येता ते लोकसभा वेंचणुकेंत गोंयांतल्यो दोनूय सुवातो भाजपाक मेळटल्यो. मुरगांव म्हालांत दक्षीण गोंया खातीर 100 टक्के आघाडी घेतले. कारण सगल्या समाजाचे लोक प्रधानमंत्री नरेंद्र मोदी हांचे बरोबर आसात. मोदी सरकार नेशन फस्ट पॉलिसी ह्या अंतोदय तत्वाचेर काम करता. दरेका कडेन वचून भाजपाच्या येवजण्यो तळागाळा मेरेन पावोवपाचें काम भाजपा सरकार करता. दक्षीण गोंयांत 50 हजार मताधिक्यांची आघाडी मेळटली. कारण सगले तरेचे लोक आमचे बरोबर आसात. कारण लोकांनी मोदी सरकाराची विकास कामां पळयल्यांत. मोदी विशीं लोकांक आदार आसा. ते खातीर लोकसभा वेंचणुकेंत गोंयांतल्यो दोनूय सुवातो भाजपा जिखतलो अशें साळकार हांणी सांगलें.
ह्या वेळार जयंत जाधव आनी अनिता थोरात हांणी लेगीत प्रधानमंत्री नरेंद्र मोदी हांच्या णव वर्सांचे कारकिर्दीचेर उजवाड घालो आनी म्हायती  दिली.