भांगरभूंय | प्रतिनिधी
म्हापशें: कळंगूटे दर्यादेगेर कोल्हापूरच्या पर्यटकाचो मोबायल फोन आनी भांगराच्या सरपळीची चोरी जाल्ली. ह्या प्रकरणांत पुलिसांनी दुबावीत अन्वर अली मोल्ला (27, रा. अस्तंत बंगाल) हाका अटक केल्या.
ही चोरयेची घडणूक फाटल्या 30 मे दिसा घडिल्ली. कागाळदार राजेश पाटील (कोल्हापूर) हो कळंगूट दर्यादेगेर आयिल्लो. ताणें आपलो मोबायल आनी भांगराची सरपळी काडून पोतयेंत घालून दर्यादेगेर दवरली आनी तो न्हावपा खातीर दर्यांत देंवलो.
न्हावून भायर आयलो तेन्ना कागाळदाराक मोबायल आनी भांगराची सरपळी दवरिल्ली पोती गायब जाल्ल्याचें दिसून आयलें. ताणें ह्या प्रकरणांत कळंगूट पुलिशेंत कागाळ दाखल केली.
ते प्रमाण पुलिसांनी चवकशी करून मंगळारा 13 जून दिसा वयल्या दुबावीत आरोपीक धरलो आनी ताचे कडल्यान चोरयेचो मोबायल जप्त केलो.
पुलीस निरिक्षक परेश नायक हांच्या मार्गदर्शना खाला हवालदार सतीश सावंत फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
