भांगरभूंय | प्रतिनिधी
समस्या उप्रासची न्हय हे खातीर खबरदारी घेवपाचें आवाहन
वास्को: वास्कोचे आमदार कृष्णा साळकार हांणी पावसा पयलींच्या विवीध कामांचो नियाळ घेतलो. ह्या वेळार प्रशासनांतल्या विवीध अधिकाऱ्यांची मंगळारा बसका घेवन विवीध विशयांचेर चर्चा केली. पावसाच्या दिसांनी कसलीच समस्या उप्रासची न्हय हे खातीर योग्य ती खबरदारी घेवपाचें आवाहन तांणी संबंदीत अधिकाऱ्यांक केलें.
रवींद्र भवनाच्या मिनी हॉलांत घेतिल्ले हे बसकेंत मुरगांवचे मुख्याधिकारी जयंत तारी, पुलीस उपअधिक्षक सलीम शेख, मुरगांवचे उपजिल्होधिकारी भगवंत करमली, मुरगांवचे मामलेदार रणजीत साळगांवकर, उजो पालोवपी दळाचे दिलीप बिचोलकर, येरादारी पुलीस निरिक्षक शैलेश नार्वेंकार, पुलीस निरिक्षक कपील नायक, भलायकी, म्हामार्ग प्राधिकरण, मुरगांव पालिका, भौशीक बांदकाम बी खात्यांचे प्रतिनिधी हाजीर आशिल्ले.
ह्या वेळार फाटले बसकेंत चर्चा केल्ल्या विशयांचो परतून नियाळ घेतलो. विवीध खात्याच्या प्रतिनिधींनी आपली मतां मांडलीं.
गटारांची नितळसाण मुरगांव पालिकेन केली ना हे विशीं चर्चा केली. उदका स्रोत खात्यान कितल्या नाल्यांची निळसाण केल्या हे संबंदी नियाळ घेतलो. हुमटून पडपाची शक्यताय आशिल्लीं झाडां मारपाचें काम हातांत घेतलां. हांगासरल्या बडोदा बँके मुखा वयलीं दोन झाडां मंगळारा मारलीं. हेर झाडांय मारपाचें काम हातांत घेतलां. झाडां मारपा खातीर जी क्रेन लागता ती मेळनाशिल्ल्यान कांय वेळा समस्या उप्रासता. कांय वेळार ती नौदळा कडल्यान हाडची पडटा.
मजगतीं, कांय वाठारांनी कामां आशिल्ल्यान क्रेन वेळार मेळना. जळारांची पैदास जावची न्हय हे खातीर भलायकी खात्याचो वास्को विभाग योग्य ती खबरदारी घेता. ते खातीर वखदांची फवारणी करतात. जळारांची पैदास जावची न्हय हे खातीर नागरिकांनीय आपलो वाठार नितळ उरचो हे खातीर दक्ष रावपाची गरज आसा. लोकांच्या सहकार्याची गरज आसा. शार वाठारांत उदक सांचचे न्हय वा उदकाचो निचरो वेवस्थीत जावचो हे खातीर रस्त्या सकयल्या गटारांची खोलाय आनी रुंदाय वाडयल्या. ते खातीर अंदूं उदक सांचपाचे प्रकार घडचे नात अशी म्हायती कृष्णा साळकार हांणी दिली.
विजेचो आपालिपा सेगीत जायत आसता. ते संबंदी योग्य ती उपाय येवजण करपाची गरज आसा. वीज विभागान हांगासरल्या पोरणे ट्रान्सफॉर्मर, कंडक्टर्स संबंदीची वळेरी दिवची ती बदलून घेवपा खातीर आपूण फाटपुरवण करता अशें साळकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
