भांगरभूंय | प्रतिनिधी
भांगरभूंय । प्रतिनिधी
कुडचडेंः 15 वर्सां पुराय जाल्ली वाहनां कावलांत काडपाचें गोंय सरकाराचे धोरण 2012 सावन बंद आशिल्ल्या खण वेवसायांतल्या ट्रक धनयांचेर सामकें अन्याय करपी आसा. तांकां सरकारान हातूंतल्यान सूट दिवची अशी मागणी दक्षीण गोंय प्रोग्रेसिव्ह ट्रक धनी संघटनेन केल्या. गोंय इलेक्टॅॉनिक्स लिमिटेड ह्या निम सरकारी कंपनी कडेन राज्यांतल्या 6 हजारां परस चड ट्रकांची नोंदणी आसा आनी ताकां 15 वर्सां जाल्यांत.ते कावलांत काडल्यार ट्रक धनयांची स्थिती गोळाक लायिल्ल्या सारकी जातली अशें संघटनेचो अध्यक्ष प्रकाश राऊत देसाय हाणे पत्रकारांक सांगलें.
2012 सावन गोंयांतलो खण वेवसाय पुरायपणान बंद आसा. ह्या 10 वर्साचे बंदीच्या काळांत ट्रक धनयांची अर्थीक परिस्थिती सामकी हलाखीची जाल्या. तेय परिस्थितींत तांणी ट्रक व्हो आपल्या कुटूंबाचो एक वांगडी मानून ताचो सांबाळ केला. सरकाराच्या स्क्रॅप धोरणाक ट्रक कावंलांत काडपाची पाळी सरकारान धनयांचेर हाडची न्हय अशें ताणे मागलां.
राज्यांतल्या खण पट्ट्यांतल्या चडश्या कुटूंबाचो ट्रक वेवसाय व्हो पोट भरपाचें एकसुरें साधन आसा. फाटल्या धा वर्सा सावन ट्रक बंद आसूनय ही कुटूंबा कशी तरी खटपट करून जीण फुडें धुकलत आसात. खण वेवसाय परत सुरू जातलो, ट्रकांक काम मेळटले आनी स्थिती सुदारली अशें आशेर ट्रक धनी आसात, स्कॅप धोरणाक लागून ताचेर कसली पाळी येतली हाचो विचार सरकारान केला काय किदें असो प्रश्न राऊत देसाय हाणे केला.
15 वर्सां वयलीं वाहना चड किलोमीटर चलिल्ल्यान इंजीन पोरणे जावंन ती धूर सोडून प्रदूशण करतात ह्या कारणाक लागून सरकारान स्क्रॅप धोरण चालीक लावपाचें थारायलां. मात 2012 सावन खण वेवसाय बंद आशिल्ल्यान खण वेवसायांत आशिल्ले हजारांनी ट्रक काम नाशिल्ल्यान बंद दवोरचे पडटल्यात. ताकां 15 वर्सां जालीं तरी ताचें पसून प्रदूशण जावचें ना असो दावो ताणे केला. संघटनेचो भांडारी कॅजिटन फर्नांडीस हाणीय स्क्रॅप धोरण खण वेवसायांतल्या ट्रक धनयांक लागू करचें न्हय अशी मागणी केल्या. ट्रक विकते घेवपा खातीर घेतिल्लें रीण जायत्या जाणांनी अजून फारीक केल्लें ना अशी म्हायती ताणे दिली.
2012 पयलीं आनी त्या उपरांत विकते घेतिल्ल्या ट्रकांक सरकारान स्कॅप धोरणांतल्यान सूट दिवची. 20 परस चड वर्सा जाल्ल्या ट्रकांक नवी इंजिना बसोवन येरादारी खातीर तांका येरादारी खात्या वरवीं मंजुरी दिवची अशी सूचोवणी फर्नांडीस हाणे केल्या.
पोरण्या ट्रकांक सरकारान मान्यताय दिल्ल्या ट्रक कंपन्याचें इंजीन बसोवपा खातीर सरकारान अनुदानाची येवजण तयार करची अशी मागणी संघटनचेचो सचीव सत्यवान गांवकारान केल्या जाल्यार फाटल्या सप्टेंबर म्हयन्यांत मुख्यमंत्र्यांक आमी मागण्याचें निवेदन सादर करूनय स्कॅप धोरण लागू करप हें आमचेंर अन्याय करपा सारकें आसा अशें जोड सचीव लक्ष्मण देसाय हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
