भांगरभूंय | प्रतिनिधी
भांगरभूंय । प्रतिनिधी
मडगांवः जे कंत्राटदारा काम करपाच्यो निविदा घेवंन काम करनात तांचेर कारवाय करपाचो निर्णय दक्षीण गोंय जिल्हो पंचायत मंडळान घेतला. जिल्हो पंचायत अध्यक्ष सुवर्णा तेंडुलकार हिचे येजमानके खाला जाल्ले जिल्हो पंचायतीचे बसकेंत कंत्राटदार कामां करतात, अर्दवट कामां करतात हे विशीं वांगड्यांनी तिडक उक्तायली. ज्या वांगड्यांच्या जिल्हो पंचायत मतदारसंघांत कामा अजून जलीं नात ताची वळेरी दिवपाक तेंडुलकार हिणे सांगलां. कामां करनाशिल्ल्या कंत्राटदारांक ब्लॅक लिश्टांत घालप तशेंच हेर कारवाय करपाचें आस्वासन तेंडुलकार हिणे वांगड्यांक दिलें.
जिल्हो पंचायत मंडळाची बसका फाटल्या बुधवारा सकाळी मडगांवांत जिल्होधिकाऱ्याचे पोरणे इमारतींतल्या जिल्हो पंचायत सभाघऱांत जाली. ह्या वेळार वेगवेगळ्या विशयांचेर भासाभास जाली. कंत्राटदार आनी तांणी घेतिल्ल्या कामांची चड चर्चा जाली. चडश्या वांगड्यांनी कंत्राटदार तशेंच संबंदीत अभियंत्या संबंदी कागाळी मांडल्यो. जिल्हो उदरगत नियोजना खाला दक्षीण गोंय जिल्हो पंचायतीच्या निधींतल्यान पंचायत वाठारांत उदरगतीचीं कामां करपा खातीर जिल्हो पंचायत वांगड्यांनी तांच्या जिल्हो पंचायत मतदारसंघांतल्या पंचायत मंडळांक अर्ज व्हरून दिल्ले. 30 पंचायत मंडळांनी अजून विहित नमुन्यांतले हे अर्ज भरून दिले नात अशी म्हायती सुवर्णा तेंडुलकारान दिली.
2022-23 च्या अर्थीक वर्सांतले हे अर्ज जिल्हो पंचायतीक भरून दिवपाक सांगिल्लें. दक्षीण गोंयांतल्या 59 पंचायत मंडळांक हे अर्ज दिल्ले. पयलीं दिल्ले अर्ज भरून दिवपाची मुजत सोपल्या. ताका लागून परत नवे अर्ज भरून दिवचें पडटले. जानेवारी- फेब्रुवारी म्हयन्यांत जिल्हो पंचायतीचो निधी मेळ्ळा. अदमासपत्रक आनी हेर प्रक्रिया कामांक लागून निविदा काडपाक कळाव जाला. सुमार 36 कामांच्यो निविदा काडपाचें काम सुरू आसा अशें तेंडुलकार हिणे सांगलें.
दक्षीण गोंय जिल्हो भवन उबारपा खातीर जिल्हो पंचायत मंडळा वतीन राज्य सरकाराक प्रस्ताव धाडला. सरकारा कडल्यान ताका अजून मंजुरी मेळ्ळी ना. भवना खातीर सुवात अजून निश्चीत केली ना. तीन सुवातो भवन बांदपा खातीर पळयल्यात अशें तेंडुलकार हिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
