भांगरभूंय | प्रतिनिधी
म्हापशें: बागा दर्यादेगेर लोकांचे मोबायल फोन चोरपी दोगां चोरांक कळंगूट पुलिसांनी अटक केली. दुबावितां कडल्यान 1.30 लाखांचे 11 मोबायल फोन जप्त केले.
अटक केल्ल्या दुबावीत चोरां मदीं सुरज राजेंद्र रविदास (27, रा. मूळ झारखंड) आनी सनी हुसैन दुल (29, रा. मूळ आसाम) हांचो आस्पाव आसा. ते बागा राबित्याक आशिल्ले.
पुलिसांनी दिल्ले म्हायती प्रमा, दोगांय दुबावितांक बागांत चोरयेच्या दुबावा वयल्यान ताब्यांत घेतिल्ले. झडटे वेळार ताचे कडेन वेगळ्यावेगळ्या ब्रॅण्डाचे 11 मोबायल फोन सांपडले. ह्या मोबायलांचें मोल सुमार 1 लाख 30 हजार रुपया जाता.
चवकशे वेळार दुबावितांनी वयले मोबायल बागा दर्यादेगे वयल्यान चोरिल्ल्याची कबुली तांणी दिली. दुबावितां आड पुलिसांनी भादंसंच्या 379 आनी 34 कलमा खाला गुन्यांव नोंद करून तांकां अटक केली.
पुलीस निरिक्षक परेश नायक हांच्या मार्गदर्शना खाला उपनिरिक्षक रमेश हरिजन, हवालदार विद्यानंद आमोणकार, पुलीस शिपाय अमीर गरड आनी प्रवीण चोडणकार ह्या पंगडान ही कामगिरी केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
