भांगरभूंय | प्रतिनिधी
वीज पुरवण खंडीत; मोल्यां सुमार 7 लाखाचें लुकसाण
फोंडें: धारबांदोडें म्हालांत बुधवारा रातीं वादळी वाऱ्या सयत पडिल्ल्या पावसांत घुरखे हांगासरल्या मुखेल रस्त्यार गुलमोहराचें झाड पडिल्ल्यान सांकाड्डें-धारबांदोडें मार्गा वयली येरादारी ठप्प जाली. तशेंच सुकतळी-मोलें हांगा लेगीत विजेच्या खांब्याचेर झाड पडिल्ल्यान वाठारांत वीज पुरवण खंडीत जाली. तशेंच हेर सुवातांनी झाडां पडिल्ल्याचे प्रकार घडले. मोलें पंचायत वाठारांत सगल्यांत चड सुमार सात लाख रुपया परस चड लुकसाण जाल्ल्याचो अदमास आसा.
घुरखे व्हॉल्तार बुधवारा रातीं पावसा सयत आयिल्ल्या वाऱ्याक लागून गुलमोहराचें झाड रस्त्यार पडलें. त्या वेळार वाठारांतलो एक विजेचो खांबो लेगीत पडलो. रस्त्यार झाड पडिल्ल्यान सांकड्डें वाठारांतल्यान फोंडें मार्गा वयल्यान वचपी सगलीं वाहनां आडकून पडलीं. हातूंत खाजगी बशींचोय आस्पाव आसा. सकाळीं 9.30 वरांच्या सुमाराक फोंडें उजो पालोवपी दळाच्या कर्मचाऱ्यांनी घडणूक थळार धांव घेवन रस्त्यार पडिल्लें झाड कुशीक काडून येरादारी सुरू करपाक मजत केली. तशेंच वीज खात्याच्या कर्मचाऱ्यांनी दुरुस्तीच्या कामाक सुरवात केली. धारबांदोड्यां उपजिल्होधिकारी कचेरे मुखार लेगीत झाड पडून विजेचे चार खांबे पडले. ताका लागून धारबांदोडें आनी सांकड्डें पंचायत वाठारांत वीज पुरवण बंद जाली.
सुकतळी मोल्यां वीज ट्रान्सफॉर्मराचेर झाड पडिल्ल्यान वाठारांत वीज पुरवण खंडीत जाली. बिरेस्तारा सकाळीं उजो पालोवपी दळाच्या जवानांनी झाड कुशीक काडले उपरांत वीज खात्याच्या कर्मचाऱ्यांनी दुरुस्तीच्या कामाक सुरवात केली. वाठारांत दोन विजेचे खांबे लेगीत मातयेभरवण जाले. मोलें वाठारांत सुमार 7 लाख रुपया परस चड लुकसाण जाल्ल्याचो अदमास उक्तायतात.
तशेंच बोंडूमळ-मोलें, अनमोड घांटांत, फर्मागुडी आनी बोरी वाठारांत रस्त्यार झाडां पडलीं. फोंडें उजो पालोवपी दळाच्या कर्मचाऱ्यांनी विवीध सुवातांनी वचून झाडां कुशीक काडून रस्तो येरादारी खातीर मेकळो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
