भांगरभूंय | प्रतिनिधी
फोंड ताकतिकेन पुरोवचो; थळाव्यांची मागणी
भुंयगत विजेचे केबल घालपा खातीर खणिल्ल्या फोंडाक लागून होंडा वाठारांत धोको निर्माण जाला. ह्या फोंडांत वाहनां पडपाची शक्यताय आसून पावसांत व्हड प्रमाणांत धोको निर्माण जावपाची शक्यताय आसा. हो फोंड ताकतिकेन पुरोवचो अशी मागणी थळाव्या लोकांनी केल्या.
भुंयगत विजेचे केबल घालपा खातीर होंडा बाजारांत रस्त्याचे कुशीक सुमार दोन मिटर खोल फोंड खणला. फाटल्या देड म्हयन्या सावन परिस्थिती आसा तशीच आसा. आतां मेरेन खूबशे अपघात ह्या फोंडाक लागून जाले.
सेगीत येरादारी ठप्प जावपाचे प्रकार घडत आसतात. हाका लागून हो फोंड ताकतिकेन पुरोवचो अशी मागणी खूबशे फावटी केली. पूण ते मागणी कडेन अजून मेरेन आडनदर जाल्या.
थळाव्या लोकांनी दिल्ले म्हायती प्रमाण सुमार दोन म्हयन्यां पयलीं विजेचे भुंयगत केबल घालपा खातीर फोंड खणिल्लो. दोन दिसांनी हो फोंड पुरयतले अशें कंत्राटदारान सांगिल्लें. पूण फाटले दोन म्हयने हो फोंड आसा तसोच आसा. फोंड खणटना माती रस्त्यार उडयल्या. हाका लागून येरादारीची कोंयडी जातना दिसता.
वाळपय-सांखळी मजगतचो हो मुखेल मार्ग. दर दिसा व्हड प्रमाणांत वाहनां ह्या वाठारांतल्यान यो-वच करीत आसतात. ह्या फोंडाक लागून सेगीत येरादारीची कोंयडी जायत आसता आनी ताचो त्रास सर्वसामान्य लोकांक बसत आसता. पावस लागीं पाविल्ल्यान ह्या फोंडांत उदक भरून अपघात घडपाची शक्यताय आसा. हाका लागून हो फोंड जाता तितले बेगीन पुरोवचो अशी मागणी थळाव्या लोकांनी केल्या.
मजगतीं, हे विशीं संबंदीत कंत्राटदारा कडेन संपर्क सादून खणिल्लो फोंड पुरोवचो अशी मागणी केली. पूण कंत्राटदार मानमानी करीत आसा आनी अरेरावीची भास वापरत आशिल्ल्याचो थारोप थळाव्या लोकांनी केला. हाका लागून सद्या तरी ह्या वाठारांत तिडकीचें ल्हार पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
