भांगरभूंय | प्रतिनिधी
मडगांव: सरकार स्थापन जावन वर्स जालें तरी मडगांवच्या रवींद्र भवनाक अजून अध्यक्ष मेळना. हाचेर सरकारान लक्ष दिवपाची गरज आसा. रवींद्र भवन सारक्या सांस्कृतीक वास्तूक वायट काळ येवप हें दुर्दैवी आसा. मंत्री आसतना रवींद्र भवनाचें नुतनीकरणा खातीरचो प्रस्ताव आनी अदमासपत्रक जीएसआयडीसी कडेन दिल्लें. तें अदमासपत्रक मंजूर करून कामांक सुरवात केल्यार कलाकारांक योग्य सुविधा मेळटल्यो अशें मत आमदार विजय सरदेसाय हांणी उक्तायलें.
रवींद्र भवनांतले वातानुकुलीत यंत्रणा बंद आसा. कॅण्टीन लेगीत सुरू करूंक नाशिल्ल्यान आमदार सरदेसाय हांकां विचारलें तेन्ना तांणी म्हणलें, रवींद्र भवनांत पाय तियात्रिस्त सभाघरांतले समस्येक लागून तियात्रिस्तांक खूबशा समस्यांक तोंड दिवचें पडटा. राज्याचे अर्थीक राजधानितूच कलाकारांक योग्य वातावरण मेळना हाची खंत आसा.
रवींद्र भवनाच्या नुतनीकरणा खातीर जीएसआयडीसी कडेन प्रस्ताव आनी अदमासपत्रक मंत्री आसतना दिल्लें. पूण ताचेर कसलीच कार्यवाही जाल्ली ना. भाजप सरकाराक लोकसभा वेंचणुकेंत दक्षीण गोंयांतली सुवात जिखपाची आसत जाल्यार तांणी आमी दिल्लें अदमासपत्रक मंजूर करून कामाक सुरवात करची. लोकांची कामां केल्यार लोक तांकां लागीं करतले अशें सरदेसाय हांणी म्हणलें.
राज्य सरकार खूबशा इव्हेंटाचेर खर्च करता. पूण गरजेच्या रवींद्र भवनाच्या कामा खातीर खर्च करचो अशेंय तांणी म्हणलें.
मजगतीं, फातोड्ड्यां मल्टीपर्पज इमारती कुशीक शाळा, म्हाविद्यालय, आयटीआय, क्रिकेट आनी फुटबॉल मैदान उबारपाच्या कामाचेर लक्ष दितले. सरकारान कांय बदल केल्यात ताचाे नियाळ घेतले उपरांत फुडलीं कामां जातलीं अशें सरदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
