भांगरभूंय | प्रतिनिधी
पणजी : सरकारी संस्थां तशेंच सरकारी वेव्हारांत 30 सप्टेंबर मेरेन 2 हजारांच्यो नोटी चलतल्यो. मार्गदर्शक तत्वां प्रमाण सप्टेंबर मेरेन 2 हजारांच्यो नोटी घेवपाक कसलीच आडखळ आसची ना, अशी गवाय मुख्यमंत्री डॉ. प्रमोद सावंत हांणी दिल्या.
2 हजारांच्यो नोटी चलनांतल्यान बंद करपाची घोशणा जाल्या. हाका लागून बँकेंत नोटी बदलून घेवपा खातीर गर्दी जावपाक लागल्या. भिरांत बाळगुपाचें कसलेंच कारण ना अशें मुख्यमंत्री डॉ. प्रमोद सावंत हांणी सांगलें.
2 हजारांच्यो नोटी सुपर मार्केटांनी घेवच्यो न्हय असो आदेश सहकार भांडारान जारी केल्लो. सकाळीं जारी केल्लो आदेश सांजवेळार फाटीं घेतलो. हाका लागून सहकार भांडारांत 2 हजारांच्यो नोटी घेतले. आस्थापनां तशेंच दुकानांनी लेगीत 2 हजारांच्यो नोटी घेवपाक हरकत ना. तांकां त्यो बँकेंत भरप शक्य जातलें.
गोंंयांत 20 हजार रकमे मेरेन 2 हजारांच्यो नोटी बदलपाक स्लीप भरपा सयत वळखपत्र (आयडी) दाखोपाची गरज ना. स्टेट बँकेच्या ह्या निर्णयाक लागून लोकांक व्हड प्रमाणांत थाकाय मेळ्ळ्या.
2 हजारांंच्या नोटींची 20 हजारांं परस चड रक्कम आसत जाल्यार स्लीप भरपा सयत आयडी दाखोवची पडटली. केंद्रांन शुक्रारा 2 हजारांंच्यो नोटो चलनांतल्यान बंंद करपाचो निर्णय जाहीर केलो. हाका लागून 2 हजारांंच्यो नोटी बँकेंत दिवन हेर नोटी घेवच्यो पडटल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
