भांगरभूंय | प्रतिनिधी
बंधारो बांदल्यार खूबशीं घरां वतलीं उदका खाला
फोंडें: मुर्डी-खांडेपार वाठारांतलीं खूबशीं घरां दर वर्सा पावसाच्या दिसांनी उदका खाला वतात. ताका लागून थळावे लोक बंधारो बांदपाक विरोध करतात. आपत्कालीन वेळार सरकारा कडल्यान गरजेची सुविधा उपलब्ध करून दिनात. तशेंच शेतकारांनी 5 वर्सां पयलीं राखणे वणत उबारपाची केल्ले मागणेची दखल अजून मेरेन उदका स्रोत खात्यान घेतिल्ली ना. वाठारांत बंधारो बांदल्यार खूबशीं घरां उदका खाला वचपाची भिरांत उक्तावन बंधारो बांदपाक थळाव्या लोकांनी खर विरोध केला.
मुर्डी-खांडेपारा मारुती देवळांत घेतिल्ले जनसुनावणे वेळार उदका स्रोत खात्याचे मुखेल अभियंते प्रमोद बदामी, सहाय्यक अभियंते शैलेश नायक, जोड मामलेदार जान्हवी कालेकार, थळावे पंचायतीचे सरपंच संजना नायक आनी हेर ग्रामस्थ व्हड संख्येन हाजीर आशिल्ले.
गांवांतलीं खूबशीं घरां दर वर्सा उदका खाला वतात. त्या वेळार सरकारी यंत्रणां गावांतले मजतीक उसरां येतात. हाचे पयलीं उदका खाला गेल्ल्या घर धनयांक अजून मेरेन सरकाराची अर्थीक मजत मेळिल्ली ना. उरफाटें आमदार, मंत्री हुंवाराच्या वेळार व्हड्यांतल्यान भोंवडी करतात आनी स्वता प्रसिद्धी घेतात. थळावे लोक नुस्त्या वेवसाय करतात आनी बंधारो बांदल्यार नुस्तें वेवसाय बंद जातलो अशी भिरांत थळाव्यांनी उक्तायली. सरकारान लोकांच्या हिताचो निर्णय घेवपाची गरज आशिल्ल्याची विनंती ह्या वेळार हाजीर आशिल्ल्या ग्रामस्थांनी केली.
उदका स्रोत खात्याचे मुखेल अभियंते प्रमोद बदामी हांणी गोंयांत फुडल्या 20 वर्सां उपरांत उदकाची समस्या गंभीर जातली. ताका लागून बंधारो बांदून उदकाची पातळी नियंत्रणांत दवरपाचो यत्न जायत आसा. लोकांचो बंधारो बांदपाक विरोध आसलो तरी फुडारांत उदकाची तरतूद करचीच पडटली अशें तांणी स्पश्ट केलें, आनी सुनावणीचो अहवाल सरकाराक धाडून दितले अशें तांणी सांगलें.
मजगतीं, सरपंच संजना नायक हांणी पंचायत मंडळा लोकां वटेन आसतलें अशें आस्वासन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
