भांगरभूंय | प्रतिनिधी
सगल्या वेव्हारांची चवकशी करून वेंचणूक घेवची
मडगांव: मुख्यमंत्री डॉ. प्रमोद सावंत हांची गोवा डेरीचेर नदर आसून कांय संचालकांचें निलंबनूय केलां. तांची चवकशी करतकूच कारवाय करपाची गरज आसा. खंयच्याय घोटाळ्यांत कर्मचार्यांचो सहभाग आसता. ताका लागून गोवा डेरीच्या कर्मचार्यांची चवकशी जावपाची गरज आसा. जो मेरेन गोवा डेरींतल्या सगल्या वेव्हारांची चवकशी पुराय जायना, तो मेरेन गोवा डेरीचो कारभार हो प्रशासका वतीनूच करचो, वेंचणूक घेवची न्हय अशी मागणी आदले संचालक दुर्गेश शिरोडकार हांणी केली.
गोवा डेरीचे आदले संचालक दुर्गेश शिरोडकार हांणी पत्रकारां कडेन उलयतना गोवा डेरी लुकसाणेंत गेल्ल्याची कारणां सोदपा खातीर आनी संबंदिताचेर कारवाय जावपा खातीर खोलायेन चवकशी करपाची मागणी केली.
गोवा डेरीचो संचालक आसतना आपणे थकीत 1 कोटी 30 लाखांची वसुली जावची हे खातीर कागाळ दाखल केल्ली. पूण ताचें कितें जालें हाची कांयच म्हायती ना. बिहार तशेंच महाराष्ट्रांत चारा घोटाळ्या सारक्या घोटाळ्यांत खूबशे जाण बंदखणींत गेले. पूण गोंयच्या गोवा डेरीची स्थिती पळयत जाल्यार डेरीचो निधी खर्च करून कसलोच विकास केल्लो ना, उरफाटें रिणांत मात वाड जाता अशें दुर्गेेश शिरोडकारान म्हणलें.
2014 सावन आतां मेरेन गोवा डेरीच्या दरेक वेव्हारांची चवकशी जावपाची गरज आसा. डेरी कित्याक लागून लुकसाणेंत गेली, संचालकांनी निधीचो वापर खंय केलो ह्या सगल्या गजालींची खोलायेन चवकशी जावची. दोशीं कडल्यान रकमेची वसुली करून तांकां बंदखणींत धाडचे अशी मागणी शिरोडकारान केली.
गोंयांतल्यो सोसायटी लाखांनी रुपयांच्या फायद्यांत आसतना राज्यांतली एकसुरी गोवा डेरी लुकसाणेंत कित्याक वता? हाचें कारण सोदपाची गरज आसा अशेंय दुर्गेश शिरोडकारान म्हणलें.
वापरूंक नाशिल्ल्या निधीची चवकशी जावची
नॅशनल डेरी डेव्हलपमेंटाचो 7.5 कोटींचो निधी 2014-15 च्या सुमाराक डेरीच्या गोवा स्टेट बँकेच्या खात्यांत आयिल्ले. ते पयशे पीएमसी बँकेत जमा केले. पूण आतां ती बँकूय बुडीत गेली आसून हो निधी वापर नासतना आसता. ह्या निधीचो वापर केल्ल्याचें प्रमाणपत्र दिले बगर फुडलो निधी मेळचो ना. ताका लागून रजिस्ट्रारा कडेन कागाळ करून शेतकारांनी ह्या प्रकरणाची चवकशी करची अशी मागणी केल्या अशें आदले संचालक दुर्गेश शिरोडकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
