भांगरभूंय | प्रतिनिधी
मुरगांव पालिकेच्या निवृत्त कामगारांचो प्रस्न
15 दिसा भितर प्रस्न निकालांत काडपाचे नगराध्यक्षाचें आस्वासन
वास्को: सातव्या वेतन आयोगाची थकबाकी, दोन वर्सां पयलीं जाहीर जाल्ल्या म्हारगाय भत्यांची थकबाकी आमकां मेळिल्ली ना. निवृत्ती वेतन वेळार मेळना. आमी आमचो उदरनिर्वाह कसो करचो, वखद विरसदाचो खर्च कसो करचो बी अशे खूबशे प्रस्न मुरगांव पालिकेच्या निवृत्त कर्मचाऱ्यांनीउपस्थीत केल्यात. ह्या प्रकरणांत आपूण मुख्याधिकाऱ्या कडेन चर्चा करून फुडल्या 15 दिसा भितर तुमचे प्रस्न निकालांत काडपाचो यत्न करतां अशें आस्वासन नगराध्यक्ष लिओ रॉड्रिगीश हांणी मुरगांव पालिकेच्या निवृत्ती कर्मचाऱ्यांक दिलें.
आपल्यो अडचणी मांडपा खातीर कांय निवृत्तीवेतनधारक कर्मचारी येवपाचे आशिल्ल्याचें समजतकूच नगराध्यक्ष रॉड्रिगीश हे तांकां स्वता मेळपाक गेले. तांची बाजू आयकून घेतली. ह्या प्रकरणांत रोखडोच उपाय काडूं अशें आस्वासन तांणी तांकां दिलें.
सेगीत निवेदनां दिवन, भेटी घेवन लेगीत आमकां न्याय मेळनाशिल्ल्याचो दावो संबंदितांनी केलो. आमकां निदान निवृत्ती वेतन वेळार दियात. कांय वेळा निवृत्ती वेतन दोन म्हयन्यांनी मेळटा, कांय वेळा अर्दो म्हयनो सोंपलो म्हणटकूच निवृत्ती वेतन हातांत पडटा. आमकां निदान म्हयन्याचे पयले तारखेक निवृत्ती वेतन दियात. जेणे करून आमकां आमच्यो गरजो भागोवंक मेळटल्यो अशे निवृत्ती वेतनधारकां मदल्या कांय जाणांनी सांगलें.
आमकां सातव्या वेतन आयोगाची थकबाकी रक्कम अजून मेळिल्ली ना. ह्या प्रकरणांत सेगीत आस्वासनां मेळत आशिल्ल्याचो दावो तांणी केलो. सगलीं बिलां तयार आसात, पूण ताचेर निर्णय कित्याक जायना असो प्रस्न तांणी उपस्थीत केलो.
ह्या प्रकरणाची दखल घेतना रॉड्रिगीशान म्हणलें, तुमच्या समस्यांची म्हाका कल्पना आसा. पूण बिलां बी सगलीं तयार केल्यांत हें म्हाका खबर नाशिल्लें. तांकां थकबाकी प्रमाण सुमार 48 लाख रुपया दिवंक जाय. तुमकां मुरगांव पालिकेची अर्थीक स्थिती कशी आसा हें खबर आसा. तरी लेगीत आपूण कितेंय हातूंतल्यान मार्ग काडपाचो यत्न करतां. भाड्या संबंदी पालिका कायद्यांत सुदारणा जायत जाल्यार मुरगांव पालिकेची अर्थीक स्थिती सुदारतली. ताका लागून हो प्रस्न आमी मुख्यमंत्री आनी शार उदरगत मंत्र्या मुखार मांडून तांकां ह्या प्रकरणांत उपाय काडपाची विनंती करतले अशें नगराध्यक्ष लिओ रॉड्रिगीश हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
