भांगरभूंय | प्रतिनिधी
व्हड प्रमाणांत लुकसाण; उजो आटापा हाडपाक येस
वाळपय: सत्तरींतल्या ठाणें पंचायत वाठारांतल्या पाली, देवकीनगर हांगासरल्या आदम खान हांचे काजींचे बागायतीक आनी रानाक उजो लागून व्हड प्रमाणांत लुकसाण जालें. वाळपय उजो पालोवपी दळाच्या जवानांनी धांव घेवन हो उजो आटापा हाडलो. पूण काजींचें व्हड प्रमाणांत लुकसाण जालां. ही घडणूक काल (बिरेस्तारा) दनपारां घडली.
हे विशीं अदीक म्हायती प्रमाण रानाक उजो लागिल्ल्याची म्हायती वाळपय उजो पालोवपी दळाचे यंत्रणेक मेळटकूच तांणी ताकतिकेन घडणूक थळार धांव घेवन उदकाचो फावारो मारून उजो आटापा हाडपाचो यत्न केलो. सुमार दोन वरां यत्न करून उजो आटापा हाडलो. पूण काजींच्या बागायतीची व्हड प्रमाणांत लुकसाणी जाल्या.
खूबशीं काजींची झाडां लासून गोबर जावन रानाचें व्हड प्रमाणांत लुकसाण जालां. हे विशीं उजो पालोवपी दळाच्या जवाना कडल्यान मेळिल्ले म्हायती प्रमाण हो उजो कसो लागलो हाची म्हायती मेळूंक शकली ना. पूण उजो व्हड प्रमाणांत लागिल्लो. सुमार दोन एकर परस चड रान आनी काजींच्या झाडांचें लुकसाण जालां. हाका लागून हो लुकसाणीचो आंकडो एका लाखा परस चड आसपाची शक्यताय उक्तायतात. हे विशींचो पंचनामो करतले आनी उपरांतूच लुकसाणीचो अदमास स्पश्ट जातलो अशें दळाच्या जवानांनी सांगलें.
पाली देवकीनगर वाठारांत आदम खान हांच्या मालकीची व्हड प्रमाणांत जमीन आसा. तांणी आतां मेरेन आपले जमनींत बरे तरेची लागवड केल्या. काजींचे लागवडी बराबर हेर लागवडीचेरूय तांणी भर दिला. पूण अचकीत उजो लागिल्ल्यान तांचें व्हड प्रमाणांत लुकसाण जाल्ले खातीर आदम खान कुटुंबाक अर्थीक लुकसाण सोंसचें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
