भांगरभूंय | प्रतिनिधी
अॅड दयानंद नार्वेंकार: नाजाल्यार गोंयचो फुडार काळखांत
म्हापशें: मोपा विमानतळ पुराय तांकीन सुरू जाले उपरांत पेडणें आनी बार्देसांत उदकाचो उणाव निर्माण जातलो. फुडारांत ही परिस्थिती टाळपा खातीर लोकांनी म्हादय न्हंय वाटावपा खातीर घरा भायर सरचें आनी सद्या सुरू आशिल्ल्या आंदोलनाक तेंको दिवचो. म्हादयचें उदक घुंवडावपाच्या यत्नांक विरोध जालो ना जाल्यार पुराय गोंयचो फुडार काळखांत उरतलो अशें मत आदले उपमुख्यमंत्री अॅड. दयानंद नार्वेंकार हांणी उक्तायलें.
‘वाग वाटायात म्हादय वाटायात’ हे मागणे खातीर म्हादय व्याघ्र अभयारण्य म्हूण घोशीत करपा खातीर म्हादय मोगींनी बुधवारा म्हापशेंच्या श्रीदेव बोडगेश्वर देवाक गाराणें घालून बार्देस म्हालांतल्या आंदोलनाक सुरवात केली.
बार्देसांत 33 पंचायतींक निवेदन सादर करतले. तशेंच सगल्या पंचायतींनी म्हादयचें उदक घुंवडावपाक विरोध करपी एकमुखी थाराव मंजूर करचो अशी मागणी ह्या निवेदनांतल्यान करतले.
ह्या वेळार पर्यावरण मोगी राजेंद्र केरकार, अॅड. सुभाष नार्वेंकार, सुधीर कांदोळकार, राहुल म्हांबरे, अॅड. शशांक नार्वेंकार, राजेंद्र घाटे आनी हेर मानेस्त हाजीर आशिल्ले.
अॅड. दयानंद नार्वेंकारान म्हणलें, म्हादय न्हंयचें उदक घुंवडावपा पसून आडावपा खातीर गोंय सरकाराचें धोरण स्पश्ट ना. म्हादयचें उदक घुंवडावपाक 1998 वर्सा हांव शिंपणावळ मंत्री आशिल्लों तेन्ना विरोध केल्लो. कर्नाटकान आपल्याक म्हादयचें 11 टीएमसी उदक जाय अशें म्हणिल्लें. पूण शिंपणावळ मंत्री आसतना हांवें कर्नाटक सरकाराक पत्र बरोवन 11 टीएमसी सोडाच, 3 टीएमसी उदक लेगीत दिवचे नात अशें तेन्नाच्या मुख्यमंत्र्याक कळयिल्लें.
सत्तेर आयिल्ल्या दरेक सरकारान कर्नाटकाचे यत्न जे पद्दतीन आयज मेरेन धुडकायल्यात तशे यत्न आतां जावप गरजेचें आसा. सद्या उदकाचो सांठो वाडोवपा खातीर नवे बंधारे वा धरणां उबारपाचो यत्न जाल्लो दिसना. एक वर्सा पावस उणो पडल्यार गोंयच्या लोकांक खूब त्रास जावंक शकता. हाका लागून म्हादय न्हंयचे म्हत्व सगल्यांनी समजून घेवचें अशें आवाहन अॅड. नार्वेंकार हांणी केलें.
पर्यावरण मोगी राजेंद्र केरकारान म्हणलें, विवीध माचये वयल्यान कर्नाटकाक विरोध करप गरजेचें आसा. कर्नाटका बरोबर म्हाराष्ट्रान लेगीत उदक घुंवडावपाचो यत्न केला. उदक घुंवडावपाचो यत्न जायत जाल्यार फुडारांतल्या परिणामांक सामकार वचचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
