भांगरभूंय | प्रतिनिधी
पंचायतीचो कसलोच परवानो घेनासतना केलें पक्कें बांदकाम
काणकोण: वापें सादोळशेंच्या दोंगरार स्वामी राज शशीभूषण पांडेन झाडां मारून पैंगीण पंचायतीचो कसलोच परवानो घेनासतना पक्के बांदकाम केलां. उत्तर प्रदेशांतल्या गोरखपूर हांगासरले स्वामीन वापें हांगा बांदिल्ल्या आश्रमाचेर कारवाय करपा खातीर दरेक बुथार जागृताय करतले अशें पैंगीण पंचायतीचो पंच वांगडी महेश नायक आनी सादोळशें प्रभागाच्यो पंच वांगडी शिल्पा विपीन प्रभुगांवकार हांणी सांगलें.
काल (बुधवारा) पंच वांगडी महेश नायक, शिल्पा प्रभुगांवकार, आदले पंच विपीन प्रभुगांवकार हांणी पुलीस बंदोबस्तांत ह्या आश्रमाक भेट दिली. त्या वेळार पत्रकारां कडेन उलयतना महेश नायक हांणी वयली म्हायती दिली.
हाचे पयलीं पंचायती वतीन स्वामीच्या बेकायदो बांदकामा संबंदी सगल्यो नोटिसी धाडून दिल्यात. 5 मेक बांदकाम पाडपाची नोटीस दिल्या. ते नोटिसीची मुजत 20 मेक सोंपता. उपरांत पंचायती वतीन ह्या बांदकामाचेर कारवाय करपाचे नदरेन मामलेदार आनी उपजिल्होधिकाऱ्याक पत्र बरयिल्ल्याचें नायक हांणी म्हणलें.
हे संबंदी स्वामी राज शशीभूषण पांडेक विचारतकूच पैंगीण पंचायतीन धाडिल्ले नोटिसीक जाप दिल्या. कांय नोटिसी आपल्याक उसरां मेळ्ळ्यो. त्या सगल्या नोटिसींक जाप दिल्या आनी कांय नोटिसींक जाप दिवपाची प्रक्रिया सुरू आशिल्ल्याचें पांडेन सांगलें.
तशेंच ही जमीन आपणें ज्या कोसंबे नांवाच्या जमीन धनया कडल्यान घेतिल्ली तांणीच थंय विपीन प्रभुगांवकार हांचे वतीन रस्तो तयार करून दिल्लो. तो रस्तो करतना लेगीत आपणें 18 लाखां परस चड पयशे खर्च केल्यात. आपूण सदशीर मार्गान वचत आशिल्ल्याचें पांडेन सांगलें.
पंचायत वेंचणुके वेळार एक जोडपें आपल्या जैता खातीर आपलो आशिर्वाद घेवपाक आयिल्लें. तेंच जोडपें आयज वेंचून आयले उपरांत भस्मासूर जाल्ल्याचें स्वामीन म्हणलें.
हे विशीं आदले पंच वांगडी विपीन प्रभुगांवकार हांकां विचारलें तेन्ना, कोसंबे हांच्या सांगण्या वयल्यान सगले सोपस्कार करून हांवें थंय रस्तो करून दिल्लो. रस्तो बांदकाम संबंदीचे पयशे हांवें घेतल्यात, आनी हेर कसलोच वेव्हार हांवें तांचे कडेन केल्लो ना. हेर सगलीं कामां करपा खातीर संबंदीत खात्याचे परवाने घेवन कामां करपाची विनंती स्वामीक केल्ली. पूण तांणी परवानगी घेनासतना बेकायदो कामां केल्ल्याचें विपीन प्रभुगांवकारान म्हणलें.
मजगतीं, उपजिल्होधिकाऱ्यान बांदकाम थांबोवपाचे आदेश दिल्ल्यान काल हांगासरले जनरेटर, टायल्सांची बॉक्सां गाडयेंत घालून हेर सुवातेर हालोवपाच्या कामाक सुरवात जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
