भांगरभूंय | प्रतिनिधी
पणजी : बँकांच्यो येवजण्यो गरीब तशेंच शेतकारां मेरेन पावपा खातीर जागृताय जावपाची गरज आसा. स्वयंपूर्ण मित्रांच्या आदारान आतां राष्ट्रीयकृत बँकांचीं गांवांगांवांनी शिबिरां वा मेळावे जातले. गांवगिऱ्या वाठारांत शिबिरां तशेंच मेळावे घेवपाचे निर्देश मुख्यमंत्री डॉ. प्रमोद सावंत हांणी दिल्यात.
मुख्यमंत्री डॉ. प्रमोद सावंत हांणी मंगळारा राज्य पांवड्या वयल्या बँकींग समितीची बसका घेतली. मुखेल सचीव पुनीतकुमार गोयल तशेंच हेर सरकारी अधिकारी बसकेक हाजीर आशिल्ले.
प्रधानमंत्री जन धन येवजण, शेती विमाे येवजण, मत्स्य संपदा येवजण अशो विवीध केंद्राच्यो येवजण्यो आसात. नुस्तेमार, दुदकार, शेतकार तशेंच उद्दग सुरू करपा खातीर केंद्राच्यो विवीध येवजण्यो आसात.
ह्या सगल्या येवजण्यांची कार्यवाही राष्ट्रीयकृत बँकां वरवीं जाता. हाका लागून शेतकार, नुस्तेमार तशेंच सामान्य नागरिकांक राष्ट्रीयकृत बँकांनी खातें उक्ते करचें पडटा. बँको तशेंच येवजण्यांची कार्यवाही कशे तरेन जाता. हे लोकांक कळपाची गरज आसा. हाका लागून गांवगिऱ्या वाठारांनी बँकांचे मेळावे तशेंच शिबिरां जावपाची गरज आसा, असो मुद्दो मुख्यमंत्री डॉ. प्रमोद सावंत हांणी बसकेंत मांडलो.
राज्यांत स्वयंपूर्ण गोंय मोहिमे खाला स्वयंपूर्ण मित्रांची नेमणूक जाल्या. मेळावे तशेंच शिबिरां आयोजीत करपाक स्वयंपूर्ण मित्र फुडाकार घेतले. केंद्राच्यो येवजण्यो लोकां मेरेन पावपाक जाय. उद्देग मळाक चालना दिवपा खातीर मुख्यमंत्री सरल उद्देग सहाय्य येवजणेची कार्यवाही जातली. कामां आवटसोर्स करपा खातीर बँकांचें पॅनल स्थापन जातलें.
राज्यांत राष्ट्रीयकृत बँकांच्या फांट्यांनी वाड जाल्या, ही बरी गजाल. शेती, नुस्तेमारी, दूद उत्पादन क्षेत्रांत केंद्राच्यो येवजण्यो लावकारी थारतल्यो.
मुख्य सचीच डॉ. पुनीत कुमार गोयल हांणी बसकेंत उलयतना बँकांच्या वेव्हारा संबंधीत आव्हानां, उपाय आनी हेर विशयांचेर मार्गदर्शन केलें.
डॉ. व्ही. कांदेवेलू हांणी बँकांनी केल्ल्या प्रगतीचेर समाधान उक्तायलें.
भारतीय रिझर्व्ह बँकेच्यो प्रादेशीक संचालक श्रीमती स्मिता सी. कुमार हांणी बँकांनी स्वयं-विश्लेशण करपाची आनी रीण दिवपाचे पद्दतींत सुदारणा करपाचे गरजेचेर भर दिलो. बँकांनी कृशी क्षेत्रांत गुंतवणूक वाडोवपाचेर भर दिवपाक सांगलें.
नाबार्डाचे उपमहावेवस्थापक व्ही.व्ही. देशपांडे हांणी विवीध येवजणांची म्हायती दिली.
एसबीआयचे उपमहावेवस्थापक विकास बासुमातरी निमाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
