भांगरभूंय | प्रतिनिधी
दक्षीण गोंय काँग्रेस अध्यक्ष सावियो डिसोझाचो खर निशेध
मडगांव: रावणफोंडार रोड ओव्हर ब्रीज आनी खरेबांद ते व्हिक्टर हॉस्पिटल मजगतीं रस्त्याची सुदारणा आनी रुंदीकरणाच्या सुवाळ्याच्या निमंत्रण पत्रिकेंतल्यान भाजपाचे नगरसेवक विरोधी आनी महिला विरोधी धोरण उक्तें जालां. मडगांवचे आमदार दिगंबर कामत हांणी निमंत्रण पत्रिकेचेर मडगांव नगरपालिकेच्यो उपाध्यक्ष दिपाली सावळ हांच्या नांवाचो उल्लेख करूंक नाशिल्ल्याच्या कृत्याचो आमी खर निशेध करतात. निमंत्रण पत्रिकेचेर हेर नगरसेवकांच्या नांवांचो उल्लेख करूंक नाशिल्ल्याचोय आमी निशेध करतात अशें दक्षीण गोंय जिल्हो काँग्रेसीचे अध्यक्ष सावियो डिसिल्वान म्हणलें.
मडगांवचे आमदार दिगंबर कामत हांकां फक्त स्वताची आनी कुटुंबाची काळजी आसा, हें मडगांवच्या लोकांनी लक्षांत घेवंक जाय. ते फक्त आपल्या पुताक आपलो राजकी वारस म्हूण मुखार हाडपा खातीर उत्सूक आसात. काँग्रेस समर्थक मॉडेल मडगांव पॅनलाचेर वेंचून आयिल्ल्या नगरसेवकां विशीं तांकां कसलोच आदर ना अशें तांणी म्हणलें.
मडगांवचे आमदार दिगंबर कामत आपूण रोखडोच गोंयचो मुख्यमंत्री जातलो असो दावो करून मडगांवच्या लोकांक पिश्यांत काडटात. तांचे बरोबर पक्षांतरांत वांटेकार जाल्ल्या सात आमदारांक मंत्री करपाचें आस्वासन दिवन तांणी तांकां पिश्यांत काडला अशें डिसिल्वान म्हणलें.
मडगांवचे खूबशे थळावे नगरसेवक काँग्रेस पक्षाच्या संपर्कांत आसात. आमी योग्य रणनितीन आमच्यो राजकी हालचाली करीत आसात, आनी आमकां विस्वास आसा की दक्षीण गोंया खातीर काँग्रेसीचे उमेदवार 2024 च्या लोकसभा वेंचणुकेंत मडगांव मतदारसंघांत आघघडेर असातले.
आमदार दिगंबर कामत हे थळाव्या नगरसेवकांचेर चेपणाचें डावपेच वापरतात. आपल्या चल्याक मडगांवचो फुडलो विधानसभा वेंचणुकेंतलो उमेदवार म्हूण विरोध करप्यांचो आवाज चिड्डुपा खातीर ते सरकारी यंत्रणा वापरतात. कोंब, मालभाट आनी आकें हांगासरल्या नगरसेवकांचो दिगंबर कामतीच्या पुताक आपलो फुडारी मानपाक खर आक्षेप आसा, आनी रोखडेच तांचे उक्तें बंड जातलें अशें सावियो डिसिल्वान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
