भांगरभूंय | प्रतिनिधी
मडगांव: गोंय विधानसभेंत दिल्ले जापेंत गोंय आपत्ती वेवस्थापन प्राधिकरण निरुपेगी आशिल्ल्याचें उक्तें जालां. कंत्राटी पद्दतीन भरती केल्ले 14 कर्मचारी आनी कांय संगणक आनी टेलिफोन हांच्या आदारान गोंयांतल्या आपत्तींक गोंय आपत्ती वेवस्थापन प्राधिकरण कशें तोंड दिवंक शकतलें हें मुख्यमंत्री स्पश्ट करतले व्हय? असो प्रस्न विरोधी पक्ष फुडारी युरी आलेमांव हांणी केलो.
मॉन्सूनाचे तयारेचो नियाळ घेवपा खातीर मुख्यमंत्री डॉ. प्रमोद सावंत हांणी काल गोंय आपत्ती वेवस्थापन प्राधिकरणा बराबर घेतिल्ले बसकेचेर प्रतिक्रिया दितना युरी आलेमांवान म्हणलें, गोंय आपत्ती वेवस्थापन प्राधिकरणाक आतां देवानूच सांबाळचें.
गोंय विधानसभेच्या प्रस्नांक दिल्ले जापे वयल्यान गोंय आपत्ती वेवस्थापन प्राधिकरणा कडेन प्रशिक्षीत कर्मचारी नाशिल्ल्याचें स्पश्ट जाता. जापेंत मुखार म्हणलां की, राज्य आपत्कालीन ऑपरेशन केंद्रांत (एसइओसी) एक डेस्कटॉप, एक एलईडी स्क्रीन, एक लँडलायन टेलिफोन हँडसेट तसेच इमर्जन्सी रिस्पॉन्स सपोर्ट सिस्टम केंद्रात (इआरएसएस) एक ड्युअल स्क्रीन पीसी सयत आयपी फोन, एक फायरहॉल तशेंच 8 एमबीपीएस इंटरनॅट लीज लायन इतलींच उपकरणां उपलब्ध आसात हाचेर युरी आलेमांव हांणी लक्ष ओडलें.
महसूल मंत्री बाबूश मोंसेरात हांणी तांचे जापेंत स्पश्टपणान सांगलां की, सरकार आपत्ती वेवस्थापनाक लागपी जड उपकरणां खातीर गोवा शिपयार्ड, मुरगांव बंदर प्राधिकरण आनी हेर खाजगी उद्देगांचेर निंबून आसा. हे जापेंत मुखार म्हणलां, विवीध आपत्तींचे वेवस्थापन करपा खातीर भौशीक बांदकाम विभाग, जलसंपदा विभाग, उजो पालोवपी दळ सेवा आनी पुलीस ह्या सारक्या संबंदीत विभागा कडेन उपकरणां आसात. पूण आमचे कडेन आशिल्ल्या खात्रेच्या म्हायती प्रमाण हातूंतल्या खंयच्याच विभागा कडेन योग्य उपकरणां आनी मनीसबळ ना असो आरोप युरी आलेमांवान केलो.
गोंयांतली आपत्ती हाताळपा खातीर गोंय आपत्ती वेवस्थापन प्राधिकरणाच्या तयारे विशीं मुख्यमंत्री डॉ. प्रमोद सावंत हांणी श्वेतपत्रिका प्रसिद्ध करची. गोंय आपत्ती वेवस्थापन प्राधिकरणा खाला कर्मचाऱ्यांचे तपशील आनी गोंयांतल्या आपत्तींक तोंड दिवपा खातीर फाटल्या तीन वर्सांत जाल्ल्यो बसका, प्रशिक्षण सत्रांची संख्या हांचो तपशील सरकारान जाहीर करचो अशी मागणी आसा अशें युरी आलेमांव हांणी म्हणलें.
अपघात आनी आपत्ती प्रवण क्षेत्रांत आशिल्ल्या गोवा शिपयार्ड आनी मुरगांव बंदर प्राधिकरणाचेर सरकार निंबून कशें रावंक शकता? असो प्रस्न विचारून युरी आलेमांवान म्हणलें, सरकारान एखाद्या आपत्ती वेळार जलद प्रतिसादा खातीर राज्यांतल्या मोक्याचे सुवातेर गरजेचीं उपकरणां आनी मनीसबळ दवरप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
