भांगरभूंय | प्रतिनिधी
भांगरभूंय । प्रतिनिधी
दिवचलः साखळी पालिका मंडळाच्या नगराध्यक्षपदार रश्मी देसाय आनी उपनगराध्यक्षपदार आनंद काणेकार हांची अपेक्षे प्रमाण बिनविरोध निवड जातली. दोगांनीय सोमाराक आपले उमेदवारी अर्ज दाखल केले. तांका नगरसेविका सिद्धी पोरोब आनी नगरसेवक दयानंद बोर्येकार हांणी अनुमोदन दिलां. नगराध्यक्ष आनी उपनगराध्यक्ष वेंचून काडपा खातीर पालिका मंडळाची खासा बसका मंगळाराक (16 मे) जातली त्या वेळार तांची अधिकृतपणान निवड जातली.
सोमाराक सकाळी मुख्यमंत्री डॉ सावंत हाचे हाजेरेंत भाजपाच्या सगल्या ईकरा नगरसेवकांची बसका जाली.त्या वेळार रश्मी देसाय आनी आनंद काणेकार हांच्या नांवांची घोशणा केली. साखळी पालिका वेंचणुकेंत 12 प्रभागांतल्या 11 प्रभागांत भाजप समर्थक उमेदवार वेंचून आयिल्ल्यान नगराध्यक्ष आनी उपनगराध्यक्षाची निवड बिनविरोध जातली हें निश्चीत जाल्लें. हे फावट नगराध्यक्षपद बायलां खातीर राखीव आसा. फाटले तीन फावट नगरसेविका म्हणून वेंचून आय़िल्ली रश्मी देसायाक नगराध्यक्ष जावपाचो पयलो मान मेळटलो. सिद्धी पोरोब, निकिता नायक, विनंती पार्सेकार, दीपा जल्मी आनी अंजना कामत अंदूच्या पालिका मंडळांत नगरसेविका आसात.
दुसरे फावट नगरसेवक जाल्ल्या आनंद काणेकाराक उपनगराध्यक्ष जावपाचो मान मेळ्ळा. रिजाज खान, दयानंद बोर्येकार, यशवंत माडकार, ब्रह्मा देसाय हे प्रणीत सत्ताधारी गटातले नगरसेवक आसात. टू गेदर फॉर खाखळे पॅनलान पालिक वेंचणूक लडयल्ली. प्रवीण ब्लेगन व्हो तांचो एकसुरो नगरसेवक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
