भांगरभूंय | प्रतिनिधी
णव्वद वर्सां पयलीं सातवी मेरेन शिकिल्ली, होममेकर, पुस्तकमोगी आमची आई चलयांक स्वयंसिद्धतेचो मंत्र दिवपी. उंचेलें शिक्षण घेतिल्ली आतांची स्वयंसिद्ध आई आपल्याक मेळूंक नाशिल्लें चलयेक मेळोवन दिवपाक रात दीस जागता. चली, चल्याचो हावेस पुराय करतना ध्येय कुशीक पडचें न्हय हाची जतनाय तिणें घेवची. शिक्षणा पासत अनवळखी संवसारांत पावल दवरतना तिका आयजय संघर्श करचो पडटा तेन्ना शिक्षण दारांत हाडपाक वावुरचें पडटलें. ‘बेटी बचाओ, बेटी पढाओ’ खातीर समृद्धी, लक्ष्मी आसा, एलआयसीय आसा. कुशळतायेच्या पावलांनी गुरूदक्षिणा शिक्षणा पासून पयस उरिल्ले गोंयचे अस्तुरेक शिक्षणांत हाडटली? जात धर्म विरयत रणरागिणी, झांशीची राणी आमचें मदीं घडोवपी नवीं विद्यापिठां येतलीं?
विखुरिल्ल्या पत्रपानांनी मातृदिना निमतान ते आवयक नमन करतना साडेतीन दसकांचे पत्रकारितेंत बळ दिवपी अस्तुरेक सलाम करुया. उपसंपादपी म्हणून मडगांवां वावुरतना चित्रा कुडचडकार, गीता हेदे, मंगला पै, गीता महाजन आमच्यो मैत्रिणी. महाराष्ट्रांतले साहित्यीक ज्ञानेश्वर नाडकर्णी हांची धूव चित्रा आनी कवी मनोहरराय सरदेसाय हांची भाची गीता हेदे व्हड कोंकणी लेखक अजुनूय जावपाक शकतात. गीता जोगळेकार राष्ट्रीय स्वयंसेवक संघाचे मडगांवचे मुखेली र. वि. जोगळेकार हांची सून. जोगळेकार हे कट्टर संघवादी, बरे शिक्षक, बरोवपीय, तांचें साहित्य आनी मुलाखती पुस्तक रुपान हाडल्यार? बुद्धिबळपटू भक्ती कुलकर्णीवरी हजारांनी तांचे शिश्य ह्या कार्याक मजतीक येतलेच. मडगांवचे आदले नगरसेवक संतोष रायतुरकार, मठग्रामांतल्यान गोंयांक मेळिल्ले पयलींचे मुख्यमंत्री, आमदार दिगंबर कामत, आर्किटेक्ट, नगरसेवक अजित हेगडे, आदले खासदार शांताराम नायक, मडगांवची पयल्यो महिला नगराध्यक्ष कमलिनी पैंगीणकार आनी हेरांच्यो मुलाखती यादींतल्यो. भारतीय क्रिकेट संघाचे आदले कॅप्टन अजित वाडेकर आनी हेर व्हडां व्यक्तीमत्वांक मेळपाची संद संपादपी चंद्रकांतबाब केणी हांणी दिली.
मुलाखत घेवपी व्यक्तीमत्व अनवळखी आसता तेन्ना ते व्यक्तीची माहिती मेळोवपाक जाय. आयज एक क्लीक केल्यार ती मेळटा आसली तरी फट, सत, चॅक, रिचॅक जायच. चंद्रकांतबाब हे म्हायतीचें भांडार, कांय वेळार मुलाखत घेवपाक तेय येताले. प्रस्नां विशीं भासाभास तांचे फियाट गाडयेन बसून मुलाखत (नोकरे खातीर इंटरव्यू न्हय) घेवपाक वतना जाताली. कागदाचेर बरयल्ल्या प्रस्ना भायर आयत्या वेळारय विचारपाचे प्रस्न आसतात. मुलाखतींतल्यान देख, माहिती, बातमी मेळोवपाची आसत जाल्यार मुलाखतकाराक चड उलोवपाक दिवपाक जाय हें शिकोवपी चंद्रकांतबाब, प्रकाशबाब थळी आयज आमचे मदीं नात. पत्रकारितेच्या तत्वां विशीं ताणीं केल्लें लिखाण आसल्यार तें पुस्तक अज्रवंर जातलें. चंद्रकांतबाबांचे अग्रलेख पुस्तक रुपान छापल्यार फुडारांतल्या राजकारणाक देख दितलें. मडगांवां मुलाखत घेतली तेन्ना दिगंबरबाब कामत मुख्यमंत्री जायत अशें चिंतूंक नाशिल्लें. मडगांवांतले नगरसेवक, वेवसायिकच न्हय जाल्यार चंद्रकांतबाब, कोंकणी मोगींनी दिल्ल्या बळग्याचेर ते मुख्यमंत्री पदा मेरेन पावले. तांच्या फुडारा विशीं र वि जोगळेकार वा चंद्रकांतबाबांनी केन्ना सांगिल्लें व्हय? चंद्रकांतबाबांचे बापूय शांतारामबाब भविश्य सांगपी (कुडमुडे न्हय, शास्त्रशुद्ध). तांच्यो खबरो चंद्रकांतबाबांनी चलता, भोंवतना सांगल्यो. चंद्रकांतबाबांच्यो धुवो, जांवय हांणी तांची बरपावळ इंग्लिशींतल्यान छापल्यार नवे पिळगेक पत्रकारितेचें, संपादनाचें गिन्यान मेळटलें. चंद्रकांतबाब गिन्यानाचो दिवो, खण आशिल्लेच त्या भायर तांच्या बापाय भशेन फुडार पळोवपाची, सांगपाची नदर तांकां आशिल्ली हें तांच्या लिखाणाचो अभ्यास करतना होल्मता.
दिसाळ्या खातीर मुलाखती घेतना त्यो कालबद्ध जावच्यो न्हय, फुडार सांगपी आसच्यो हे खातीर त्यो वेळार मेळपा खातीर नियोजन करचें पडटा. नियोजनाचें म्हत्व वरिश्ठ पत्रकार सुरेश स. नाईक हांचे कडल्यान 21 व्या शेंकड्यांत वतना कळ्ळें. वर्साचें, पंद्रशीचें अशें करत करत नियोजनय आतां नित्याचें जालां, सकाळ सावन रातीं उसरां मेरेन तातूंत संपादकांचे आतांचे पिळगेक बुडून रावचें पडटा. दिसाळीं मल्टीमिडिया (भोवमाध्यमी) युगांत पाविल्ल्यान कर्मचाऱ्यांक मल्टीटास्कर जाले बगर पर्याय ना.
भोवमाध्यमी युगांत पत्रकारितेचें मूळ शेणटा तेन्ना सरकार साठ- सत्तर वर्सां आदल्या कायद्यांत बदल करपाक, ते कावलांत काडपाक सोदतलेंच. पत्रकारिते विशीं कायद्यांत बदल करतना वेवसायीक पत्रकारिते वांगडा समाजमनाच्या आरशाक जे पत्रकार समजून घेतात तांकां सरकारान विस्वासांत घेवचें पडटलें. भोवमाध्यमाचो विस्तार जाला पूण फावो तशे कायदे नाशिल्ल्यान माध्यमां विस्कटतात, विखुरतात आनी ताचे परिणाम समाजाचेरय जातात. कायद्याचें गिन्यान आशिल्ल्यांकच न्हय जाल्यार कामगार फुडाऱ्यां कडेन मेकळेपणान भासाभास केल्यार फुडलीं पंचवीस वर्सां उरपी कायदे जातले.
दिसाळ्यांत विंगड- विंगड विभाग आसतात, गांवा-गांवांतले, राज्यां-राज्यांतले, राष्ट्रा-राष्ट्रांतले खबरांकार भोवमाध्यमी तेंपार म्हत्वाचे. तांचे खातीर, तांचे राखणे पासत कायदे गरजेचे. माध्यमा विशींचे मूळ कायदे देश पावंड्यावेले, नेमावळींतल्यान थळाव्यांक आसपावन घेवप राज्य सरकाराचो वावर. राज्यांतल्या पत्रकारां पासत केल्ली नेमावळ, येवजणी देशांत आदर्श जावपी वावर केरळ, गोंय सरकारान केला. नेमावळ, येवजणे खातीर तुमी आमी केल्ल्या वावराची माहिती दिवपाचे येत्न विखुरिल्ल्या पत्रपानांनी करुया. लोकमान्य बाळ गंगाधर टिळक, गोपाळ गणेश आगरकर हांचें कार्य आयजय यादींत आसा. तुमकां, आमकां टिळक, आगरकर जावप शक्य नासलें तरी तत्वां विसरायेर पडची न्ही हे खातीर सादूर रावया. समाजा पासत केल्ल्या वावराची कोणेंच याद दवरली ना, पुरस्कार, भोवमान मेळळे ना तरी समाजाक जागोवप (जागल्या) थांबोवप ना. जागल्या, जासूस जाल्यारच खबरो, हेडलायनी मेळटल्यो. फोटोग्राफर, गांवांतले खबरांकारय देखदिणो वावर करतात. तांकां विखुरिल्ल्या पत्रपानांनी, पुस्तकांनी तुमी आमी आसपावन घेवया.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
