भांगरभूंय | प्रतिनिधी
रेशनकार्डधारकांनी उक्तायली तिडक
नागरी पुरवण खात्यान घेतली दखल
वास्को: मुरगांव म्हालांतल्या कांय सवाय धान्य दुकानांतल्यान किडिल्लो आनी निकृश्ट दर्जाचो तांदूळ रेशनकार्ड धारकांक वितरीत केल्ल्यान रेशनकार्ड धारकांनी तिडक उक्तायली. ह्या तांदळांत बरड पडिल्ल्यान तो खावपाचे लायकीचो नासून लेगीत लोकांच्या माथ्यार मारला. ह्या प्रकरणांत संबंदीत दुकानदारांनी आवाज काडले उपरांत नागरी पुरवण खात्याच्यो मुरगांवच्यो निरिक्षक सरीता मोरजकार हांणी दखल घेतना हो तांदूळ बदलून दिवपाची सुचोवणी कुठ्ठाळेंतल्या सरकारी गुदांवांतल्या अधिकार्याक केल्या.
मजगतीं, ह्या तांदळाचे साक परतून गुदंवांत व्हरपा खातीर तशेंच थंयच्यान बदलून मेळिल्ले साक परतून दुकानांत हाडपा खातीर जी येरादारी आनी मजूर खर्च लागतलो तो कोणे उबारप हो प्रस्न आसा.
धान्यांत पारव्यांची पिसा, विश्ठो, बरड, किडे मेळप ही गजाल नवी न्हय. हाचे पयलीं अश्यो गजाली घडल्यात. ते संबंदी म्हायती दिवन लेगीत कसलीच उपाय येवजण जायना. आतां हे गाजलीक सोशल मिडियार आवाज उठयिल्ल्यान नागरी पुरवण संचालक आनी थळावे निरिक्षक हांणी स्पश्टीकरण दिवचें पडटलें अशें कांय सवाय धान्य दुकानदारांनी सांगलें.
कुठ्ठाळे सरकारी गुदांवांत धान्य सांठयतात. मुरगांव म्हालांतल्या सगल्या सवाय धान्य दुकानदारांक थंयच्यान धान्य हाडचें पडटा. मुरगांव म्हालांतल्या कांय सवाय धान्य दुकानदारांनी गुदांवांतल्यान आपल्या कार्डधारकां खातीर लागपी तांदूळ हाडला. गुदांवांत दितात ते धान्य सवाय धान्य दुकानादार न्हयकारूंक शकनात. पूण तांदळाचे साक दुकानांत उक्ते केले उपरांत तातूंत बरड आशिल्ल्याचें दिसून आयलें. बरडीक लागून तांदूळ खावपा लायकीचो उरूंक नाशिल्लो. ह्या प्रकरणांत सवाय धान्य दुकानदारांनी आपल्या व्हॉट्सअॅप ग्रुपार सदर फोटू प्रसिद्ध केले उपरांत तो हेर कडेन पावलो आनी लोकांनी तिडक उक्तायली.
आपणाक सोमारा चड कागाळी मेळ्ळ्यो. ह्या प्रकरणांत आपूण गुदांव मुखेल्याक म्हायती दिल्या. संचालकांक तोंडी म्हायती दिल्ल्याचें सरीता मोरजकार हांणी सांगलें. पेड्डेर जाल्ल्या तांदळाचें वितरण करचे न्हय. ज्या दुकानदारांक पेड्डेर तांदूळ मेळ्ळा तांणी तो कुठ्ठाळी गुदांवांतल्यान बदलून घेवचो अशें आवाहन सरीता मोरजकार हांणी केलें. नागरी पुरवण खात्यान रेशनकार्डा संबंदी कारवाय करपाक सुरवात केल्ल्यान कार्डधारकांची संख्या उणी जाली. ताका लागून सवाय धान्य दुकानदारांनी लेगीत उणो कोटा उबारिल्ल्यान खूबशें धान्य गुदांवांत पडून उरिल्लें. त्या उरिल्ल्या तांदळांत बरड पडपाची शक्यताय सरीता मोरजकार हांणी उक्तायली.
गुदांवांत नेमान पेस्ट कंट्रोल करतात. ह्या प्रकरणांत आपणे पेस्ट कंट्रोल करप्यां कडेन संपर्क सादला ताणें शुक्रार मेरेन पेस्ट कंट्रोल करपाचें आस्वासन दिलां. तें काम करतना आपूण थंय जातीन हाजीर रावतली अशें सरीता मोरजकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
