भांगरभूंय | प्रतिनिधी
बांयो सुकिल्ल्यान लोकांक टँकराच्या उदकाची पुरवण
फोंडें: शिरोडें पंचायत वाठारांतल्या पाजवाड्या वयल्यो बांयो आटिल्ल्यान थळाव्यांक उदका खातीर वळवळे काडपाची वेळ आयल्या. गांवांतल्या बांयांनी उदक नाशिल्ल्यान पयलेच फावटी लोकांक टँकराच्या उदकाची पुरवण करपाक सुरवात केल्या. ते खातीर लोकांक उदक सांठोवन दवरपा खातीर घरा मुखार आयदनां दवरचीं पडटात. फुडल्या कांय दिसांनी पावस पडलो ना जाल्यार लोकांची चड धांदळ जातली अशें थळाव्या लोकांनी सांगलें.
पाजवाडो वाठारांत सुमार 70 ते 80 घरां आसात. गांवांत आशिल्ल्या ब्रह्मदुर्गा देवस्थाना कुशीच्या बांयचें उदक पंप बसोवन पुरवण करतात. पूण फाटल्या कांय दिसा सावन बांयंत उदकूच नाशिल्ल्यान थळाव्यांची न्हीद खळ्ळ्या. कांय दिसा पयलीं थळाव्या लोकांनी बांदकाम खात्याक कळयले उपरांत गांवांत टँकरांतल्यान उदकाची पुरवण करपाक सुरवात जाली. गांवांत देवळाची एक बांय आसून ती बांय लेगीत सुकिल्ले अवस्थेंत आसा. सद्या सकाळीं अर्द वर आनी सांजवेळा अर्द वर पंप सुरू करतात. पूण सगल्यांकूच उदका पुरवण जायत नाशिल्ल्यान कितलेशेच लोक पंप सुरू करपी बांदकाम खात्याच्या कर्मचार्याच्या घरा येवपाचे प्रकार वाडल्यात.
फोंेडें म्हालांतले बांदकाम खात्याचे सहाय्यक अभियंतो काशिनाथ सराफ हांणी पाजवाड्यार पयलेच फावटी बांय पुरायपणान सुकल्या अशें सांगलें. ते खातीर ग्रामस्थांक टँकरांतल्यान उदकाची पुरवण करपाक सुरवात केल्या. ग्रामस्थांनी उदक वेवस्थीतपणान वापरपाचो सल्लो लेगीत दिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
