भांगरभूंय | प्रतिनिधी
म्हापशें: बागा कळंगूट हांगासरले खाडयेंत सुभाष नांवाच्या एका 40 वर्सा पिरायेच्या तरणाट्याक बुडून मरण आयलें. मयत हो बेघर आसून बागा दर्यादेगेर दिसवड्याचो कामगार म्हूण काम करतालो.
ही घडणूक मंगळारा सकाळीं 8.45 वरांच्या सुमाराक उक्तडार आयली. बागा-हडफडें पुला कुशीक हेम्मर्ज क्लबाचे फाटले वटेनचे खाडयेंत एका तरणाट्याची कूड उफेत आशिल्ल्याची म्हायती पुलीस आनी उजो पालोवपी दळाक मेळ्ळी.
पिळर्ण उजो पालोवपी दळाच्या जवानांनी थळाव्या नुस्तेमार लोकांच्या आदारान ही कूड भायर काडली. कळंगूट पुलिसांनी पंचनामो करून मयताची कूड बांबोळे गोमॅकाँत मड्या कुडींत धाडून दिल्या.
मजगतीं, मयताक सुभाष ह्याच नांवान बागा दर्यादेगे वयले लोक वळखताले. ताचे पुराय नांव कोणाकूच खबर ना. तशेंच ताचे कडेन कसलेच तरेचें वळखपत्र पुलिसांक सांपडलें ना.
मयत दिसवड्यार काम करून दर्यादेगेरूच न्हिदतालो. सोर्याचे घुंवळेंत पडून तो बुडलो आसुये असो दुबाव पुलिसांनी उक्तायला. मयताच्या कुटुंबाचो सोद पुलीस घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
