भांगरभूंय | प्रतिनिधी
मनोज परब: सरकारान आंदोलन चिगळावपाचो यत्न केल्यार करतले खर
पेडणें: पेडणें मतदारसंघांत फाटल्या सात आठ दिसा सावन मोपा विमानतळ प्रकल्प ग्रामस्थांचें आंदोलन सुरू आसा. रिव्होल्युशनरी गोवन्साचे मुखेली मनोज परब हांणी ह्या आंदोलनकर्त्यांची भेट घेवन आरजी पक्षाचो ह्या आंदोलनाक तेंको आशिल्ल्याचें जाहीर केलें.
ह्या वेळार पत्रकारां कडेन उलयतना परब हांणी म्हणलें की, आंदोलनकर्त्यांच्यो मागण्यो रास्त आनी न्यायीक आसात. तांचो हो लढो लोकशायेच्या मार्गान आसा. संविधानीक आनी अहिंसेच्या मार्गान आसा. राज्य सरकारान ह्या मोपा विमानतळाच्या प्रकल्पा खातीर जांची जमीन गेल्या, तांकां आस्वासन दिल्लें की तांकां ते जमनीचे पयशे मेळटले. टॅक्सी कावंटर मेळटलो, तांकां नोकर्यो मेळटल्यो तशेंच तांकां धंदो लेगीत मेळटलो. पूण आयज मेरेत तांकां कांयच मेळ्ळें ना.
आंदोलनकर्त्यांच्यो मागण्यो ल्हान आसात तांकां फक्त टॅक्सी कावंटर, जमनीचो मोबोदलो आनी नोकर्यो मागल्यात. खंयचीच कबलात मागिल्ली ना. तरी लेगीत सरकार तांकां दिवंक शकलें ना. पेडणेंकार आयज व्हड अपेक्षेन ह्या विमानतळार नोकरी, टॅक्सी वेवसाय करपाक मेळटलो हे आशेन आसात. पूण सरकाराक तांच्यो मागण्यो पुराय करपाक कसली हरकत आसा असो प्रस्न परब हांणी उपस्थीत केलो.
आयज पेडणेंकारांनी स्वताच्यो जमनी ह्या विमानतळाक दिल्यात. पूण तांकांच आयज थंय काम मेळना. पेडणेंकारांक टॅक्सी वेवसाय करपाक मेळना. तांचेर बहिश्कार घाल्ले प्रमाण ते आतंकवादी आशिल्ले प्रमाण तांकां कुशीक दवरल्यात. हो पडणेंकारांचेर जाल्लो अन्याय आसा. हो खंय तरी थांबूंक जाय.
आतां लोकसभेची वेंचणूक जातली. परतून हेच सरकार मतां मागपाक येतलें. लोकांक पिश्यांत काडटले. लोकांक फटीचीं आस्वासनां दितले आनी तांची फटवणूक करतले. 2024 चे वेंचणुके पयलीं ग्रामस्थांच्यो मागण्यो पुराय करच्यो. तांकां तांच्या जमनींचो मोबदलो दिवचो, तांकां नोकर्यो दिवच्यो, तांकां टॅक्सी कावंटर उपलब्ध करून वेवसाय करपाची संद दिवची अशी विनंती मनोज परबान सरकारा कडेन केल्या.
पेडणेंकारांक टॅक्सी वेवसाय करपा खातीर कावंटर आनी हेरांक नोकर्यो मेळ्ळ्यो नात आनी गोंया भायल्यांची दादागिरी अशीच चालू उरली जाल्यार आमी खपोवन घेवचे नात. गोंय सरकार जर ही चळवळ लोकां मदीं मतभेद हाडून चिगळावपाचो यत्न करीत आसत जालयार आरजी पेडणेंकारांच्या घर कणकणीं वचून लोकजागृताय करतली आनी हें आंदोलन आनीक खर करून पेडणेंकारांक तांचो हक्क मेळोवन दितले अशी शिटकावणी मनोज परबान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
