भांगरभूंय | प्रतिनिधी
कथीत वीज घोटाळो प्रकरण
मडगांव: कथीत वीज घोटाळो प्रकरणांत मंत्री मॉवीन गुदिन्हो हांच्या वकिला कडल्यान सुनावणे खातीर गैरहाजीर रावपाची सूट मेळपा विशींचो अर्ज न्यायालयांत सादर केल्लो. ह्या अर्जाचेर सुनावणी जाली तेन्ना गुदिन्हो हांची सद्या तरी ह्या प्रकरणांत हाजीर रावपाची गरज नाशिल्ल्याचें लक्षांत घेवन गैरहाजीर रावपाची मेकळीक दिल्या. ह्या प्रकरणांत शुक्रारा दोन साक्षिदारांचे जबाब नोंद केल्यात.
कथीत वीज घोटाळो प्रकरणांत दक्षीण गोंय जिल्हो विशेश न्यायालयांत शुक्रारा जाल्ले सुनावणे वेळार मंत्री मॉवीन गुदिन्हो हे कांय कामाक लागून गैरहाजीर रावले. ते विशीं वकिलान न्यायालयांत अर्ज सादर केला. हाचे बगर मॉवीन गुदिन्हो हांणी सुनावणी सुरू आस मेरेन न्यायालयांत गैरहाजीर रावपाची सूट मेळची असो अर्ज गुदिन्हो हांच्या वकिलान सादर केलो, तेन्ना गुदिन्हो हांची सद्या तरी सुनावणेक हाजीर रावपाची गरज नाशिलल्याचें लक्षांत घेवन न्यायालया कडल्यान तांकां गैरहाजीर रावपाची सूट दिल्या.
पूण गरज आसत जाल्यार तांकां न्यायालयांत हाजीर रावचें पडटलें अशेंय स्पश्ट केलां. सुनावणे वेळार वीज कर्मचारी जयेंद्र भोमे आनी संध्या कोरडे हांच्यो साक्षी नोंद केल्यात. ह्या प्रकरणांत संबंदीत पावत्यां विशींचे स्टेटमेंटूय न्यायालयांत सादर केल्यात.
ह्या प्रकरणाची फुडली सुनावणी 9 जून दिसा सकाळीं 10 वरांचेर जातली. ह्या वेळार हाजीर रावपाची आनीक तीन साक्षिदारांक समन्स जारी करपाचे आदेशूय न्यायालयान दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
