भांगरभूंय | प्रतिनिधी
मजती खातीर कुंदन फोगेरी हांचो फुडाकार
दिवचल: बंदरवाडो दिवचले लक्ष्मण हत्तरकार हांच्या घर वजा खोपीक भिरांकूळ उजो लागून सगल्या सामाना सयत घराचो गोबर जालो. घरांत भांगराच्यो वस्ती तशेंच रोख रक्कम लेगीत लासून गेल्ल्यान सुमार स लाख रुपयांचें लुकसाण जाल्ल्या हत्तरकार हांचेर मोटे संकश्ट आयलां.
मजगतीं, ही परिस्थिती पळोवन हांगाचे युवा उद्देजक, समाजसेवक कुंदन फोगेरी हांणी ताकतिकेन फुडाकार घेतना आमदार डॉ. चंद्रकांत शेट्ये तशेंच हेर लोकांच्या आदारान निधी एकठांय करून सदर परिवारा खातीर तात्पुरतो निवारो उपलब्ध करून दिला.
आमदार चंद्रकांत शेट्ये, नगरसेविका अपर्णा फोगेरी, कुंदन आनी चंदन फोगेरी हांणी तशेंच फारूक शेख, श्रीपाद कुमारजुंवेंकार, केतन आमोणकार, नियमात पठाण, इजाज सय्यद, सावळा राम च्यारी, नरेश कडकडे, प्रेमनाथ च्यारी, आदले आमदार नरेश सावळ, सतीश गांवकार तशेंच हेरांनी विवीध स्वरुपांत मजत केली आनी सहकार्य दिलें. ह्या घर वजा खोपींत 16 लोक रावतात. तातूंत एक 15 दिसांचें भुरगें आशिल्लें. सुदैवान ताची सुखरूप सुटका केली.
ह्या परिवाराक लोकांनी ताकतिकेन पोरण्या पुलीस स्टेशनाचे सुवातेंत आसरो दिला. मामलेदार, तलाठी, वीज अभियंतो बी हांणी विवीध स्वरुपांत सहकार्य केलें.
दिवचल उजो पालोवपी दळाचे शैलेश गावडे हांच्या मार्गदर्शन खाला जवानांनी दोन वरां यत्न करून उजो आटापा हाडलो. पूण लुकसाण व्हड प्रमाणांत जालां. उज्याचो पंचनामो केला आनी घर पुराय जळून गोबर जाल्ल्यान व्हड आपत्ती ह्या परिवाराचेर आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
