भांगरभूंय | प्रतिनिधी
कथीत बलात्कार प्रकरण; 5 जून पसून साक्ष नोंद करपाक सुरवात
मडगांव: कथीत बलात्कार प्रकरणांत मंत्री बाबूश मोंसेरात हांणी हे सुनावणेक कायमचो गैरहाजीर रावपाची परवानगी मेळची असो अर्ज केल्लो. ताचेर युक्तिवाद जाले उपरांत न्यायालयान बाबूश मोंसेरात हांकां हे सुनावणेक गैरहाजीर रावपा विशींचो अर्ज मान्य करून परवानगी दिली. ज्या वेळार गरज असता त्या वेळार सुनावणे खातीर आपयतले. ह्या प्रकरणांत 5 जून सावन दर सप्तकाक तीन दीस सुनावणी घेतले.
कथीत बलात्कार प्रकरणांत मंत्री बाबूश मोंसेरात हांचे आड दक्षीण गोंय जिल्हो विशेश न्यायालयांत सुनावणी सुरू आसा. ह्या प्रकरणांत हें प्रकरण एखाद्या बायल न्यायाधिशा कडेन सोंपोवचें ही सरकारी वकिलाची मागणी न्यायालयान भायरायली. जाल्यार हें प्रकरण खूबशीं वर्सा रखडिल्ले आशिल्ल्यान हाचेर रोखडीच सुनावणी घेवपाची मागणी बाबूश हांच्या वकिलांनी न्यायालयांत केल्ली. हाचे आदीं 28 एप्रील दिसा जाल्ले सुनावणे वेळार बाबूश हांच्या वकिलान हें प्रकरण बाबूश मोंसेरात हांकां कायमचो गैरहाजीर रावपाची सूट दिवपा विशींचो अर्ज न्यायालयांत सादर केल्लो.
शुक्रारा जाल्ले सुनावणेक बाबूश मोंसेरात गैरहाजीर आशिल्ले जाल्यार रोझी फेर्रांव हाजीर आशिल्ली. बाबूश हांच्या अर्जाचेर युक्तिवाद जालो तेन्ना हाचे पयलींचे सुनावणेक बाबूश प्रत्यक्ष हाजीर रावल्यात. जाल्यार मंत्री आशिल्ल्यान बाबूश मोंसेरात हांकां सूट दिवपाची मागणी केल्या. न्यायालया कडल्यान बाबूश मोंसेरात हांच्या वकिलान दाखल केल्ल्या अर्जाचेर निवाडो दितना हो अर्ज मान्य करीत बाबूश मोंसेरात हांकां कायमचो हे सुनावणे वेळार उपस्थीत न रावपाची परवानगी दिली.
ह्या प्रकरणांत गरज आसल्यार बाबूश हांकां न्यायालयांत आपयतले. ह्या प्रकरणांत फुडली सुनावणी 5 जून दिसा सकाळीं धा वरांचेर दवरल्या. हाचे बगर बाबूश हांच्या वकिलान म्हायती दितना सांगलें की, ह्या प्रकरणांत 5 जून सावन दर सप्तकाक सोमार, बुधवार आनी शुक्रारा सकाळीं सुनावणी घेतले. हे विशींची कार्यावळ दवरल्या. 1 ते 5 क्रमांकाच्या साक्षिदारांची साक्ष घेतले उपरांत हेर साक्षिदारांची साक्ष आनी उरफाटी तपासणी घेतले. पयले फावटी साक्ष नोंदयतल्या 20 साक्षिदारांची वळेरी तयार केल्या. उपरांत फुडली कार्यावळ थारायतले. पिडितेची वळख उक्ती जावची न्हय हे खातीर गरज पडल्यार तिका न्यायालयांत हजर करपा बदला व्हिडियो कॉन्फरसिंगा वरवीं हाजीर रावपाक सागूं येता अशेंय अॅड. धोंड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
